បរទេស៖ ក្រសួងការពារជាតិនៅទីក្រុង Minsk (បេឡារុស្ស) បានប្រកាសកាលពីថ្ងៃអង្គារថា ប្រទេសបេឡារុស្សបាន បញ្ជូនទាហានបាញ់រ៉ុក្កែត និងកាំភ្លើងធំទៅកាន់ប្រទេសរុស្ស៊ី សម្រាប់ចូលរួមសមយុទ្ធយោធា។
យោងតាមសារព័ត៌មាន RT ចេញផ្សាយនៅថ្ងៃទី១៣ ខែសីហា ឆ្នាំ២០២៤ បានឱ្យដឹងថា សារខ្លីបាននិយាយថា សមយុទ្ធនេះនឹងពាក់ព័ន្ធនឹង ការប្រើប្រាស់ប្រព័ន្ធបាញ់រ៉ុក្កែតជាច្រើន នៅជួរយោធាដែលមិនបាន បញ្ជាក់នៅក្នុងប្រទេសរុស្ស៊ី។
យោងតាមសេចក្តីថ្លែងការណ៍ គឺកាលពីថ្ងៃចន្ទ ទីក្រុង Minsk បានរាយការណ៍ថា ខ្លួនក៏បានបញ្ជូនកងកម្លាំងការពារ ដែនអាកាសសម្រាប់ធ្វើសមយុទ្ធរួមគ្នា ជាមួយកងទ័ពរុស្ស៊ី។ ទាហានបេឡារុស្សបានធ្វើដំណើរតាមយន្តហោះ Il-76 ទៅកាន់ Ashuluk ក្នុងតំបន់ Astrakhan ភាគខាងត្បូងនៃប្រទេសរុស្ស៊ី។
ចលនាកងទ័ពកើតឡើងចំពេលដែលការ លុកលុយរបស់អ៊ុយក្រែនចូលទៅក្នុងតំបន់ Kursk របស់រុស្ស៊ី ដែលបានចាប់ផ្តើមកាលពីមួយសប្តាហ៍មុន និងពាក់ព័ន្ធដោយប្រយោលដល់ប្រទេសបេឡារុស្ស នៅពេលដែលក្រុងគៀវបានបាញ់បង្ហោះដ្រូន kamikaze ឆ្លងកាត់ដែនអាកាសរបស់ប្រទេសនេះ។
ទីក្រុង Minsk មិនជាប់ពាក់ព័ន្ធដោយផ្ទាល់ នៅក្នុងជម្លោះអ៊ុយក្រែននោះទេ ប៉ុន្តែការការពារដែនអាកាសរបស់ខ្លួន ដែលរួមបញ្ចូលជាមួយរុស្ស៊ី បានស្ទាក់ចាប់យន្តហោះគ្មានមនុស្សបើកមួយចំនួន និងជួយកងកម្លាំងរុស្ស៊ីកំណត់គោលដៅផ្សេងទៀត នេះបើយោងតាមមន្ត្រីបេឡារុស្ស។
បេឡារុស្ស ធ្លាប់បានចោទប្រកាន់ទីក្រុងគៀវ ពីការបង្កហេតុនៅជិតព្រំដែនរបស់ខ្លួន។ ចំពេលមានអរិភាពនៅក្នុងតំបន់ Kursk ដែលមានចម្ងាយប្រហែល ១៨០ គីឡូម៉ែត្រពីប្រទេសបេឡារុស្ស ប្រទេសនេះក៏បានបង្កើនវត្តមានយោធារបស់ខ្លួន នៅជុំវិញព្រំដែនជាមួយអ៊ុយក្រែនផងដែរ ៕
ប្រែសម្រួលៈ ណៃ តុលា
