បរទេស៖ រដ្ឋាភិបាលវៀតណាម និងប្រព័ន្ធផ្សព្វផ្សាយរដ្ឋចិនបានឱ្យដឹងថា មេដឹកនាំកំពូលរបស់វៀតណាម លោក To Lam នឹងធ្វើទស្សនកិច្ចជាផ្លូវការនៅប្រទេសចិន ពីថ្ងៃអាទិត្យរហូតដល់ថ្ងៃទី ២០ ខែសីហា ដោយការពង្រឹងទំនាក់ទំនងជិតស្និទ្ធ រវាងប្រទេសជិតខាងដែល គ្រប់គ្រងដោយកុម្មុយនិស្ត។
យោងតាមសារព័ត៌មាន VOA ចេញផ្សាយកាលពីថ្ងៃទី១៥ ខែសីហា ឆ្នាំ២០២៤ បានឱ្យដឹងថា ក្នុងដំណើរទស្សនកិច្ចបរទេសលើកដំបូង ចាប់តាំងពីលោកបានតែងតាំងក្នុងខែនេះជាអគ្គលេខាធិការបក្សកុម្មុយនិស្ត កំពុងកាន់អំណាចរបស់វៀតណាម លោក Lam ត្រូវបានគេរំពឹងថា នឹងជួបជាមួយប្រធានាធិបតីចិន Xi Jinping និងមន្ត្រីផ្សេងទៀត។
ថ្វីបើមានទំនាក់ទំនងសេដ្ឋកិច្ច និងពាណិជ្ជកម្មក៏ដោយ ក៏ប្រជាជាតិទាំងពីរបានប៉ះទង្គិចគ្នាម្តងម្កាល ជុំវិញបញ្ហាព្រំដែនក្នុងសមុទ្រចិនខាងត្បូង ដែលសម្បូរដោយធនធានប្រេង ដែលជាផ្លូវទឹកដ៏សំខាន់មួយដែលត្រូវបាន ទាមទារដោយទីក្រុងប៉េកាំងស្ទើរតែទាំងស្រុង ទោះបីជាមានការទាមទារត្រួតស៊ីគ្នា ដោយប្រទេសជាច្រើនក៏ដោយ។
ដំណើរទស្សនកិច្ចរបស់លោក Lam ធ្វើឡើងបន្ទាប់ពីមានការអញ្ជើញពីលោក Xi និងភរិយា, រដ្ឋាភិបាលវៀតណាមបាននិយាយនៅក្នុងសេចក្តីថ្លែងការណ៍ មួយកាលពីថ្ងៃព្រហស្បតិ៍ ដែលបានបញ្ជាក់ពីរបាយការណ៍មុនរបស់ Reuters ស្តីពីដំណើរទស្សនកិច្ចនេះ។
ទិន្នន័យគយវៀតណាមបង្ហាញថា ប្រទេសចិនគឺជាដៃគូពាណិជ្ជកម្ម ដ៏ធំបំផុតរបស់វៀតណាម ជាមួយនឹងពាណិជ្ជកម្មរវាងប្រទេសពីរក្នុងរយៈពេល ៧ ខែដំបូងនៃឆ្នាំនេះកើនឡើង ២៥% ពីឆ្នាំមុន រហូតដល់ ១១២ ពាន់លានដុល្លារ៕
ប្រែសម្រួលៈ ណៃ តុលា
