បរទេស៖ អ្នកនាំពាក្យក្រសួងការពារជាតិចិន លោក Zhang Xiaogang បានប្រាប់អ្នកសារព័ត៌មានកាលពីថ្ងៃសុក្រថា អាមេរិកគឺជាគ្រោះថ្នាក់ដ៏ធំបំផុត សម្រាប់ពិភពលោក នៅពេលដែលវាឈានដល់ហានិភ័យ នៃជម្លោះនុយក្លេអ៊ែរដ៏មានសក្តានុពល។ ទីក្រុងប៉េកាំងបានចោទប្រកាន់ក្រុងវ៉ាស៊ីនតោនថា បានធ្វើ “ការសម្រេចចិត្តមិនទទួលខុសត្រូវ” ក្នុងការប៉ុនប៉ងដើម្បីរក្សាអនុត្តរភាពរបស់ខ្លួន (ភាពចងសត្រូវ) រួមទាំងតាមរយៈការបំភិតបំភ័យសហគមន៍អន្តរជាតិ ជាមួយនឹងឃ្លាំងអាវុធនុយក្លេអ៊ែររបស់ខ្លួន។
យោងតាមសារព័ត៌មាន RT ចេញផ្សាយនៅថ្ងៃទី១៦ ខែសីហា ឆ្នាំ២០២៤ បានឱ្យដឹងថា សេចក្តីថ្លែងការណ៍រិះគន់ធ្ងន់នេះ បានធ្វើឡើងជាការឆ្លើយតបទៅនឹង ការសម្រេចចិត្តរបស់មន្ទីរបញ្ចកោណ ក្នុងការដំឡើងកងកម្លាំងអាមេរិកជប៉ុន ទៅជាទីបញ្ជាការកងកម្លាំងរួម ក្រោមការបញ្ជារបស់មន្ត្រីផ្កាយបី ដែលរាយការណ៍ទៅមេបញ្ជាការ នៃទីបញ្ជាការឥណ្ឌូប៉ាស៊ីហ្វិក។ ការប្រកាសនេះត្រូវបានធ្វើឡើងដោយ ក្រសួងការពារជាតិអាមេរិកកាលពីចុងខែកក្កដា បន្ទាប់ពីកិច្ចប្រជុំរបស់ប្រមុខការពារជាតិអាមេរិក និងជប៉ុន និងប្រធានគោលនយោបាយការបរទេស។
រដ្ឋមន្ត្រីការពារជាតិអាមេរិក លោក Llyod Austin បានសាទរចំពោះការអភិវឌ្ឍន៍នេះថាជា “ការកែលម្អដ៏រឹងមាំបំផុតមួយ នៅក្នុងទំនាក់ទំនងយោធារបស់យើង ជាមួយប្រទេសជប៉ុនក្នុងរយៈពេល ៧០ ឆ្នាំ” នៅពេលនោះ។ លោកក៏បាននិយាយថា ភាគីទាំងពីរបានធ្វើកិច្ចប្រជុំថ្នាក់រដ្ឋមន្ត្រីពីរបូកពីរដាច់ដោយឡែកពីគ្នា លើការរារាំងបន្ថែម ហើយមិនធ្លាប់មានពីមុនមក។ ក្នុងអំឡុងពេលនៃកិច្ចប្រជុំនេះ សហរដ្ឋអាមេរិកបានប្តេជ្ញាថានឹង “ការពារប្រទេសជប៉ុនជាមួយនឹង សមត្ថភាពពេញលេញ រួមទាំងសមត្ថភាពនុយក្លេអ៊ែរ” នេះបើយោងតាមរដ្ឋមន្ត្រីការពារជាតិ៕
ប្រែសម្រួលៈ ណៃ តុលា
