គៀវ៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី២២ ខែសីហា ថា ប្រធានាធិបតីអ៊ុយក្រែន លោក វូឡូឌីមៀ ហ្សេឡិនស្គី បានទៅទស្សនាតំបន់ Sumy ភាគឦសាននៃប្រទេសអ៊ុយក្រែន ដែលមានព្រំប្រទល់ជាប់នឹងប្រទេសរុស្ស៊ី។
ក្នុងដំណើររបស់លោក លោក ហ្សេឡិនស្គី បានទៅទស្សនាតំបន់ព្រំដែន Sumy និងបានជួបជាមួយអគ្គមេបញ្ជាការនៃ កងកម្លាំងប្រដាប់អាវុធអ៊ុយក្រែនលោក Oleksandr Syrsky និងអភិបាលតំបន់ Sumy លោក Volodymyr Artyukh ។
លោក Syrsky បានឲ្យដឹងនៅក្នុងកិច្ចប្រជុំនោះថា កងកម្លាំងអ៊ុយក្រែន បានគ្រប់គ្រងការតាំងទីលំនៅ មួយផ្សេងទៀតនៅក្នុងតំបន់ Kursk ភាគខាងលិចរបស់រុស្ស៊ី ហើយបានចាប់ខ្លួនទាហានរុស្ស៊ីបន្ថែមទៀត។
សម្រាប់ផ្នែករបស់លោកវិញ លោក Artyukh បានឲ្យដឹងថា ការបាញ់ផ្លោងនៃតំបន់ Sumy និងចំនួនជនស៊ីវិល ដែលស្លាប់បាត់បង់ជីវិតនៅក្នុងតំបន់នេះ បានថយចុះចាប់តាំងពីការចាប់ផ្តើម ប្រតិបត្តិការរបស់អ៊ុយក្រែននៅក្នុងតំបន់ Kursk ។
ក្នុងអំឡុងពេលនៃកិច្ចប្រជុំនេះ ភាគីបានពិភាក្សាអំពីសកម្មភាព សម្របសម្រួលរវាងយោធា ប៉ូលីស និងសេវារដ្ឋរបស់អ៊ុយក្រែន សម្រាប់គ្រាអាសន្ននៅតំបន់ព្រំដែន និងការរៀបចំក្បួនរថយន្តមនុស្សធម៌ ទៅកាន់តំបន់ Kursk ។
អ៊ុយក្រែនបានចាប់ផ្តើមប្រតិបត្តិការ យោធានៅក្នុងតំបន់ Kursk កាលពីថ្ងៃទី០៦ ខែសីហា ក្នុងនោះលោក Syrsky បានឲ្យដឹងមុននេះថា អ៊ុយក្រែនបានកាន់កាប់ កន្លែងតាំងទីលំនៅជាង ៩០ នៅក្នុងតំបន់ដែលរងគ្រោះដោយជម្លោះ៕
ប្រែសម្រួល ឈូក បូរ៉ា
