ប្រមុខយូអិន សម្ដែងការព្រួយបារម្ភយ៉ាងខ្លាំង ជុំវិញការផ្ទុះអាវុធ​ នៅព្រំដែនរវាងលីបង់ និងអ៊ីស្រាអែល

យូអិន ៖ អ្នកនាំពាក្យបានឲ្យដឹងថា អគ្គលេខាធិការអង្គការសហប្រជាជាតិលោក Antonio Guterres មានការព្រួយបារម្ភយ៉ាងខ្លាំង ចំពោះការផ្ទុះអាវុធឆ្លងកាត់ខ្សែបន្ទាត់ពណ៌ខៀវដែលជាព្រំដែនលីបង់ – អ៊ីស្រាអែល។

លោក Stephane Dujarric អ្នកនាំពាក្យ របស់ប្រធានអង្គការសហប្រជាជាតិ បានឲ្យដឹងនៅក្នុងសេចក្តីថ្លែងការណ៍មួយថា “លោកអគ្គលេខាធិការ មានការព្រួយបារម្ភយ៉ាងខ្លាំង ចំពោះការកើនឡើង គួរឱ្យកត់សម្គាល់ នៃការផ្លាស់ប្តូរការបាញ់ប្រហារ នៅទូទាំងខ្សែបន្ទាត់ពណ៌ខៀវរវាងប្រទេសទាំងពីរ” ។

សេចក្តីថ្លែងការណ៍បានឲ្យដឹងថា “សកម្មភាពទាំងនេះបានធ្វើឱ្យប្រជាជនលីបង់ និងអ៊ីស្រាអែលប្រឈមនឹងហានិភ័យ ក៏ដូចជាការគំរាមកំហែង ដល់សន្តិសុខ និងស្ថិរភាពក្នុងតំបន់” ។

លោក Guterres បានអំពាវនាវឱ្យមានការបន្ធូរបន្ថយជាបន្ទាន់ និងលើភាគីនានាឱ្យ “បញ្ឈប់ជាបន្ទាន់ និងភ្លាមៗ” ត្រឡប់ទៅការបញ្ឈប់អរិភាព និងអនុវត្តយ៉ាងពេញលេញនូវដំណោះស្រាយ ១៧០១ របស់ក្រុមប្រឹក្សាសន្តិសុខអង្គការសហប្រជាជាតិ។

នៅក្នុងសេចក្តីថ្លែងការណ៍ រួមមួយ ដែលត្រូវបានបង្ហោះនៅលើវេទិកាប្រព័ន្ធផ្សព្វផ្សាយសង្គម X កាលពីថ្ងៃអាទិត្យ អ្នកសម្របសម្រួលពិសេស របស់អង្គការសហប្រជាជាតិ សម្រាប់ប្រទេសលីបង់ (UNSCOL) Jeanine Hennis-Plasschaert និងកងកម្លាំងបណ្តោះអាសន្ន របស់អង្គការសហប្រជាជាតិ នៅក្នុងប្រទេសលីបង់ (UNIFIL) បានជំរុញឱ្យអ៊ីស្រាអែល និងក្រុមហេសបូឡា “ជៀសវាងពីសកម្មភាព កើនឡើងនៃជម្លោះបន្ថែមទៀត” ។

សេចក្តីថ្លែងការណ៍បានឲ្យដឹងទៀតថា “ដោយមើលឃើញពីការអភិវឌ្ឍន៍ដ៏គួរឱ្យព្រួយបារម្ភនៅទូទាំងខ្សែបន្ទាត់ពណ៌ខៀវ ចាប់តាំងពីព្រឹកព្រលឹម UNSCOL និង UNIFIL អំពាវនាវឱ្យទាំងអស់គ្នាបញ្ឈប់ការបាញ់ប្រហារ និងជៀសវាងពីសកម្មភាពកើនឡើងនៃជម្លោះបន្ថែមទៀត”៕
ប្រែសម្រួល ឈូក បូរ៉ា