បរទេស៖ អ្នកដំណើរចំនួន៤ នាក់ត្រូវបានបាញ់សម្លាប់ ពេលកំពុងដេកនៅលើរថភ្លើងក្នុងរដ្ឋ Illinois សហរដ្ឋអាមេរិក ។ ជនសង្ស័យត្រូវបានចាប់ខ្លួន ប៉ុន្តែគេមិនដឹងពីមូលហេតុ នៃការបាញ់ប្រហារនោះទេ។
យោងតាមសារព័ត៌មាន VN EXPRESS ចេញផ្សាយនៅថ្ងៃទី៣ ខែកញ្ញា ឆ្នាំ២០២៤ បានឱ្យដឹងថា ប៉ូលីសនៅទីក្រុង Chicago រដ្ឋ Illinois សហរដ្ឋអាមេរិក បានទទួលការហៅទូរស័ព្ទទៅលេខ៩១១ នៅព្រឹកព្រលឹមថ្ងៃទី២ ខែកញ្ញា ហើយបានរកឃើញជនរងគ្រោះចំនួន ៤ នាក់ដែលត្រូវបានបាញ់នៅពេល ពួកគេមកដល់ស្ថានីយ៍រថភ្លើង Forest Park ។ ជនរងគ្រោះទាំងអស់គឺជា អ្នកដំណើរនៅលើរថភ្លើង ដោយអង្គុយឆ្ងាយពីគ្នា ហើយមិនមានសញ្ញានៃការតស៊ូនោះទេ ហើយជាក់ស្តែងគឺត្រូវបានគេបាញ់ប្រហារ ខណៈពេលដែលកំពុងដេក។
ប៉ូលីសបាននិយាយថា “មនុស្ស ៣នាក់ត្រូវបានប្រកាសថា បានស្លាប់នៅកន្លែងកើតហេតុ ចំណែកជនរងគ្រោះទី ៤ ត្រូវបានបញ្ជូនទៅមជ្ឈមណ្ឌលវេជ្ជសាស្ត្រ Loyola University ក្នុងទីក្រុង Maywood ប៉ុន្តែក៏បានស្លាប់ផងដែរ” ។
លោក Christopher Chin អនុប្រធានប៉ូលីស Forest Park បាននិយាយថា ការបាញ់ប្រហារបានកើតឡើង នៅក្នុងទូរថភ្លើងពីរខណៈពេល ដែលរថភ្លើងកំពុងធ្វើដំណើរ។ នគរបាលបានកំណត់មុខសញ្ញាជនសង្ស័យ ដោយផ្អែកតាមរូបភាពតាមដាន និងចាប់ខ្លួនបានហើយ និងកាំភ្លើងត្រូវបានរកឃើញ។
មន្ត្រី Chicago មិនបានបញ្ចេញអត្តសញ្ញាណជនរងគ្រោះ និងជនសង្ស័យ ឬហេតុផលនៃការវាយប្រហារនេះទេ។ សេចក្តីថ្លែងការណ៍របស់ប៉ូលីសទីក្រុង Chicago បាននិយាយថា “នេះហាក់ដូចជាឧបទ្ទវហេតុដាច់ដោយឡែកមួយ ហើយមិនមានការគំរាមកំហែងដែលកើតឡើង ចំពោះសហគមន៍នោះទេ” ៕
ប្រែសម្រួលៈ ណៃ តុលា
