តូក្យូ៖ ទីភ្នាក់ងារថាមពលបរមាណូអន្តរជាតិបានឲ្យដឹងថា វិធីសាស្រ្តរបស់ប្រទេសជប៉ុន សម្រាប់ការកែច្នៃដីនៅក្នុងខេត្តហ្វូគូស៊ីម៉ា ដែលត្រូវបានដកចេញចំពេលមានកិច្ចខិតខំប្រឹងប្រែងសម្អាតវិទ្យុសកម្មបន្ទាប់ពីគ្រោះមហន្តរាយនុយក្លេអ៊ែរឆ្នាំ២០១១ គឺស្របតាមស្តង់ដារសុវត្ថិភាពអន្តរជាតិ។
របាយការណ៍ចុងក្រោយរបស់អង្គការឃ្លាំមើលនុយក្លេអ៊ែរ របស់អង្គការសហប្រជាជាតិ ស្តីពីបញ្ហានេះ ប្រគល់ជូនរដ្ឋមន្ត្រីក្រសួងបរិស្ថានលោក Shintaro Ito នៅទីក្រុងតូក្យូ នៅថ្ងៃដដែលនោះ ត្រូវបានគេរំពឹងថា នឹងជួយរដ្ឋាភិបាលជប៉ុន បង្កើនកិច្ចខិតខំប្រឹងប្រែង ដើម្បីប្រើប្រាស់ឡើងវិញនូវផ្នែកមួយនៃផ្ទៃដីដ៏ច្រើន ដែលបច្ចុប្បន្នត្រូវបានរក្សាទុកនៅរោងចក្របណ្តោះអាសន្ន សម្រាប់គម្រោងការងារសាធារណៈទូទាំងប្រទេស។
ដីវិទ្យុសកម្មប្រហែល ១៤លានម៉ែត្រគូប និងកាកសំណល់ផ្សេងទៀត ដែលកើតចេញពីសកម្មភាពបន្សាបជាតិពុល ត្រូវបានដាក់នៅក្នុងកន្លែងបណ្ដោះអាសន្ន ដែលសាងសង់នៅជិតរោងចក្រ Fukushima Daiichi ដែលរងគ្រោះដោយគ្រោះមហន្តរាយ។
ដី និងកាកសំណល់ ដែលមានកម្រិតវិទ្យុសកម្មខ្ពស់ នឹងមិនត្រូវបានកែច្នៃឡើងវិញនោះទេ ហើយគ្រោងនឹងបោះចោលនៅខាងក្រៅខេត្តភាគឦសានត្រឹមខែមីនា ឆ្នាំ២០៤៥ ប៉ុន្តែទិសដៅចុងក្រោយមិនទាន់ត្រូវបានកំណត់នៅឡើយទេ។
បន្ទាប់ពីការត្រួតពិនិត្យសុវត្ថិភាពរយៈពេល ១៦ ខែ ដែលរាប់បញ្ចូលទាំងការត្រួតពិនិត្យកន្លែងស្តុកទុកបណ្តោះអាសន្ន និងការសាកល្បងកែច្នៃដីនៅក្នុងខេត្តនោះ IAEA បានឲ្យដឹងថា ក្រុមអ្នកជំនាញរបស់ខ្លួនបានសន្និដ្ឋានថា វិធីសាស្រ្តរបស់ក្រសួងបរិស្ថានជប៉ុន រហូតមកដល់បច្ចុប្បន្នសម្រាប់ការកែច្នៃឡើងវិញ និងការចោលចុងក្រោយនៃដីដែលបានយកចេញ ហើយកាកសំណល់ គឺ “ស្របតាមស្តង់ដារសុវត្ថិភាព IAEA”៕
ប្រែសម្រួល ឈូក បូរ៉ា
