បរទេស ៖ ប៉ូលីសក្នុងរដ្ឋញូវយ៉ក សហរដ្ឋអាមេរិក បានបដិសេធសេចក្តីរាយការណ៍ អំពីការរកឃើញគ្រាប់បែក នៅក្នុងរថយន្តមួយគ្រឿង នៅខាងក្នុងបរិវេណសន្តិសុខ នៃទីតាំងនៃការប្រមូលផ្តុំ នាពេលខាងមុខ របស់បេក្ខជនប្រធានាធិបតីអាមេរិក ដូណាល់ ត្រាំ ។
យោងតាមសារព័ត៌មាន RT ចេញផ្សាយនៅថ្ងៃទី១៨ ខែកញ្ញា ឆ្នាំ២០២៤ បានឱ្យដឹងថា បេក្ខភាពប្រធានាធិបតីមកពីគណបក្សសាធារណរដ្ឋ លោក ដូណាល់ ត្រាំ គ្រោងនឹងនិយាយនៅឯកន្លែងប្រជុំ Long Island ភាគខាងកើតទីក្រុងញូវយ៉កនៅល្ងាចថ្ងៃពុធ។
អ្នកកាសែត One America News (OANN) James Lalino បាននិយាយនៅលើ Xថា “ប្រភពនៅ Nassau County Police បានប្រាប់ខ្ញុំថា “បរិវេណត្រូវបានបំពាន ហើយធុងពណ៌ខៀវមួយត្រូវបានដកចេញ” ពីតំបន់ជុំវិញកន្លែងប្រមូលផ្តុំគ្នារបស់លោក ដូណាល់ ត្រាំ នៅពេលយប់នោះ” ។
យោងតាមប្រភព របស់លោក Lalino គឺមានសត្វឆ្កែប៉ូលីសមួយក្បាល “បានរកឃើញឧបករណ៍គ្រឿងផ្ទុះនៅក្នុងរថយន្តមួយគ្រឿង ហើយអ្នកបើកបរ បានរត់ចូលទៅក្នុងព្រៃ។ គ្មានអ្នកណាឃើញថា អ្នកបើកបរមានកាន់អ្វីខ្លះនោះទេ គេគ្រាន់តែឃើញគាត់រត់ចេញទៅ»។ ក្រោយមកប៉ូលី Nassau County Police បានបដិសេធរបាយការណ៍របស់លោក Lalino ។
អ្នកគាំទ្រគណបក្ស សាធារណរដ្ឋរាប់ពាន់នាក់ បានតម្រង់ជួររួចហើយនៅខាងក្រៅ Nassau Coliseum ជាកន្លែងដែល លោក ដូណាល់ ត្រាំ ត្រូវបានគេសន្មត់ថា នឹងនិយាយនៅម៉ោង ៧យប់ម៉ោងក្នុងស្រុក ។ អ្នកខ្លះត្រូវបានគេរាយការណ៍ថា បានបោះជំរំនៅខាងក្រៅពេញមួយយប់ ដើម្បីទទួលបានកៅអីខាងមុខនៅក្នុងការជួបជុំនោះ។
សូមជម្រាបថា លោក ដូណាល់ ត្រាំ បានផ្លាស់ប្តូរការប្រមូលផ្តុំ របស់លោកទៅកន្លែងអគារបិទជិតវិញ បន្ទាប់ពីរួចផុតពីការប៉ុនប៉ង ធ្វើឃាតនៅឯការជួបជុំនៅ ខាងក្រៅថ្ងៃទី១៣ ខែកក្កដានៅទីក្រុង Butler រដ្ឋ Pennsylvania ។ ខ្មាន់កាំភ្លើងបានបាញ់យ៉ាងហោចណាស់ប្រាំបីគ្រាប់ ដោយត្រូវត្រចៀករបស់លោក ប៉ុន្តែក៏បានសម្លាប់សមាជិកទស្សនិកជនម្នាក់ និងរបួសធ្ងន់ពីរនាក់ទៀត មុនពេលដែលអ្នកលបបាញ់នោះ ត្រូវបានសេវាសម្ងាត់បាញ់សម្លាប់វិញ ៕
ប្រែសម្រួលៈ ណៃ តុលា
