យូអិន ៖ បេសកជនចិន បានជំរុញឱ្យអ៊ីស្រាអែល បោះបង់ចោលការពឹងផ្អែករបស់ខ្លួនលើការប្រើប្រាស់កងកម្លាំង និងការបំភាន់នៃការស្វែងរកជ័យជំនះ ផ្នែកយោធាពេញលេញនៅក្នុងតំបន់ហ្គាហ្សា និងបញ្ឈប់ការរំលោភលើអធិបតេយ្យភាព និងសន្តិសុខរបស់ប្រទេសលីបង់។
នៅឯសន្និសីទក្រុមប្រឹក្សាសន្តិសុខអង្គការសហប្រជាជាតិ ស្តីពីស្ថានការណ៍នៅមជ្ឈិមបូព៌ា រួមទាំងសំណួរ របស់ប៉ាឡេស្ទីន លោក Geng Shuang តំណាងអចិន្ត្រៃយ៍រង របស់ចិនប្រចាំអង្គការសហប្រជាជាតិ បានឲ្យដឹងថា ឥទ្ធិពលនៃការផ្ទុះឡើងពីការបន្តប្រយុទ្ធគ្នា នៅតំបន់ហ្គាហ្សា កំពុងបង្ហាញឱ្យឃើញ ក្នុងល្បឿនប្រយុទ្ធកាន់តែខ្លាំងនៅក្នុងប្រទេសលីបង់ ហើយអ៊ីស្រាអែល កំពុងឈានដល់ចំណុចកំពូលនៃជម្លោះទាំងអស់ ដែលរារាំងសន្តិភាព និងស្ថិរភាពនៃមជ្ឈិមបូព៌ាទាំងមូល ។
លោកបានលើកឡើងថា “ចិន ជំរុញឱ្យអ៊ីស្រាអែលបោះបង់ការស្រមើស្រមៃ របស់ខ្លួន ជាមួយនឹងការប្រើប្រាស់កម្លាំង និងការបំភាន់របស់ខ្លួនក្នុងការស្វែង រកជ័យជំនះផ្នែកយោធាពេញលេញ ក៏ដូចជាបញ្ចប់ប្រតិបត្តិការយោធារបស់ខ្លួនភ្លាមៗនៅតំបន់ហ្គាហ្សា បញ្ឈប់ការរំលោភលើអធិបតេយ្យភាព និងសន្តិសុខរបស់ប្រទេសលីបង់ និងបញ្ឈប់ការប្រថុយប្រថានណាមួយ ដែលអាចធ្វើឲ្យតំបន់ ធ្លាក់ចូលទៅក្នុងគ្រោះមហន្តរាយមួយផ្សេងទៀត”។
ដោយពិពណ៌នា អំពីដំណោះស្រាយ ដែលកំណត់ដោយប៉ាឡេស្ទីន និងអនុម័តដោយមហាសន្និបាត អង្គការសហប្រជាជាតិ ក្នុងគ្រាអាសន្នពិសេស កាលពីថ្ងៃពុធថាជា “ចំណុចសំខាន់ជាប្រវត្តិសាស្ត្រ” លោក Geng បានលើកឡើងថា ដំណោះស្រាយ ទាមទារឱ្យអ៊ីស្រាអែល បញ្ចប់វត្តមានខុសច្បាប់ របស់ខ្លួននៅក្នុងទឹកដីប៉ាឡេស្ទីនដែលកាន់កាប់ដោយជំរុញឱ្យភាគីទាំងអស់ បញ្ឈប់ការផ្តល់អាវុធដល់អ៊ីស្រាអែល និងបញ្ជាក់ជាថ្មីថា នីតិរដ្ឋអន្តរជាតិត្រូវតែប្រកាន់ខ្ជាប់ ហើយអំពាវនាវឱ្យមានការពន្លឿន ការអនុវត្តដំណោះស្រាយរដ្ឋពីរ ។
លោកបានបន្ដថា ដំណោះស្រាយបង្កប់នូវការយល់ព្រមយ៉ាងទូលំទូលាយរបស់សហគមន៍អន្តរជាតិក្នុងការលើកកម្ពស់យុត្តិធម៌ និងការសម្រេចបានសន្តិភាពនៅមជ្ឈិមបូព៌ា”។
បេសកជនបានកត់សម្គាល់ថា សកម្មភាពរបស់អ៊ីស្រាអែលក្នុងរយៈពេលប៉ុន្មានទសវត្សរ៍កន្លងមកនេះ រួមទាំងការបន្តពង្រីកការតាំងទីលំនៅ និងការច្របាច់យកលំហរ និងលទ្ធភាពជោគជ័យរបស់ប៉ាឡេស្ទីនក្នុងនាមជារដ្ឋមួយ បន្តបំផ្លាញមូលដ្ឋានគ្រឹះនៃដំណោះស្រាយរដ្ឋពីរ៕
ប្រែសម្រួល ឈូក បូរ៉ា
