បរទេស៖ យោងតាមការចេញផ្សាយរបស់ RT ជនភៀសខ្លួនជាជនជាតិអ៊ុយក្រែនមួយចំនួនធំ នៅទូទាំងអឺរ៉ុបខាងលិចអាចក្លាយជា មនុស្សគ្មានផ្ទះសម្បែង ខណៈដែលជម្លោះរវាងទីក្រុងមូស្គូ និងគៀវខិតជិតដល់ឆ្នាំទី៣ទៅហើយនោះ។
របាយការណ៍ដែលបានដកស្រង់ ចេញពីកាសែតប្រចាំថ្ងៃរបស់អង់គ្លេស Guardian បានឲ្យដឹងទៀតថា មនុស្សជាច្រើននៃអ្នកដែលបានភៀសខ្លួន ពីការប្រយុទ្ធទៅកាន់លោកខាងលិច គឺប្រឈមនឹងហានិភ័យ នៃការបញ្ចប់តាមផ្លូវដោយសារតែ ការថយចុះ ការគាំទ្ររបស់រដ្ឋាភិបាល។
ប្រភពដដែលបានសរសេរទៀតថា នេះនឹងអាចបង្កើនចំនួនប្រជាជន ដែលគ្មានផ្ទះសម្បែងនៅអឺរ៉ុបយ៉ាងសំខាន់ ដោយពិចារណាថា យោងតាមទិន្នន័យរបស់អង្គការសហប្រជាជាតិ មានជនភៀសខ្លួនអ៊ុយក្រែនប្រហែល ៦,១លាននាក់ មកហើយនៅក្នុងចក្រភពអង់គ្លេស និងសហភាពអឺរ៉ុប។
នៅក្នុងប្រទេសអង់គ្លេស គ្រួសារជនភៀសខ្លួនជាង ៩,០០០នាក់ ត្រូវបានគេរាយការណ៍ថា ស្ថិតនៅក្រោមការគំរាមកំហែង នៃភាពគ្មានផ្ទះសម្បែង នេះបើយោងតាមតួលេខដោយកាកបាទក្រហម ខណៈដែលអាជ្ញាធរក្នុងតំបន់ផ្តល់ឱ្យពួកគេនូវជំនួយ មិនគ្រប់គ្រាន់ ហើយឥឡូវនេះប្រទេសទាំងនោះ ហាក់មិនសូវចង់ផ្តល់កន្លែងស្នាក់នៅ ដល់ប្រជាជនអ៊ុយក្រែនទៀតនោះទេ ៕
ប្រែសម្រួល៖ ស៊ុន លី
