ទីភ្នាក់ងារស៊ើបការណ៍សម្ងាត់អាមេរិក ភ័យខ្លាចពីការសងសឹកដ៏ខ្លាំងក្លាមកវិញពីសំណាក់រុស្ស៊ី ជុំវិញការអនុញ្ញាតឱ្យអ៊ុយក្រែនប្រើមីស៊ីលរយៈចម្ងាយឆ្ងាយ

បរទេស៖ សារព័ត៌មាន New York Times បានរាយការណ៍កាលពីថ្ងៃព្រហស្បតិ៍ថា ទីភ្នាក់ងារស៊ើបការណ៍សម្ងាត់អាមេរិកបានព្រមានថា ទីក្រុងមូស្គូអាចនឹងសងសឹកដោយផ្ទាល់ប្រឆាំងនឹងក្រុមអ្នកគាំទ្រលោកខាងលិចរបស់ទីក្រុងគៀវ ប្រសិនបើបណ្តាប្រទេសទាំងនោះអនុញ្ញាតឱ្យអ៊ុយក្រែនប្រើមីស៊ីលរយៈចម្ងាយឆ្ងាយដើម្បីវាយប្រហារជ្រៅនៅក្នុងប្រទេសរុស្ស៊ី។

យោងតាមសារព័ត៌មាន RT ចេញផ្សាយនៅថ្ងៃទី២៧ ខែកញ្ញា ឆ្នាំ២០២៤ បានឱ្យដឹងថា យោងតាមការវាយតម្លៃស៊ើបការណ៍សម្ងាត់ដែលដកស្រង់ដោយកាសែត New York Times អ្នកវិភាគជឿថា ទោះបីជាអ៊ុយក្រែនត្រូវបានអនុញ្ញាតឱ្យប្រើកាំជ្រួចដែលផ្គត់ផ្គង់ដោយលោកខាងលិចដោយសេរីក៏ដោយ វានឹងមិនមានផលប៉ះពាល់ខ្លាំងដល់ជម្លោះនោះទេ ដោយសារតែចំនួនមានកំណត់របស់ពួកគេ។ លើសពីនេះ បន្ទាប់ពីការវាយប្រហារដំបូង រុស្ស៊ីទំនងជានឹងផ្លាស់ប្តូរទីតាំងមុខងារសំខាន់ៗចេញពីជួរមុខ ដែលធ្វើឱ្យវាកាន់តែពិបាកសម្រាប់ទីក្រុងគៀវក្នុងការសម្រេចបាននូវគោលបំណងយោធាណាមួយ។

ជាងនេះទៅទៀត ការសម្រេចចិត្តបែបនេះនឹងក្លាយជាការលេងល្បែងដែលមានប្រាក់ភ្នាល់ខ្ពស់ ព្រោះវាអាចនាំឱ្យមានការវាយប្រហារ “ដ៍ខ្លាំងក្លា” លើទ្រព្យសម្បត្តិយោធាអាមេរិកទូទាំងពិភពលោក។

សូមជម្រាបថា សហរដ្ឋអាមេរិក និងសម្ព័ន្ធមិត្តបានផ្តល់ឱ្យអ៊ុយក្រែននូវប្រព័ន្ធមីស៊ីលរយៈចម្ងាយឆ្ងាយចំនួនបីប្រភេទគឺ ATACMS ដែលផលិតដោយអាមេរិក, មីស៊ីល Storm Shadows របស់អង់គ្លេស និងមីស៊ីល SCALP របស់បារាំង។ ទីក្រុងគៀវបានប្រើប្រាស់កាំជ្រួចទាំងនេះម្តងហើយម្តងទៀត ដើម្បីតម្រង់គោលដៅទៅលើហេដ្ឋារចនាសម្ព័ន្ធ និងតំបន់ស៊ីវិលនៅតំបន់គ្រីមៀ និងតំបន់ផ្សេងទៀតដែលបានក្លាយជាផ្នែកមួយនៃប្រទេសរុស្ស៊ី៕

ប្រែសម្រួលៈ ណៃ តុលា