បរទេស ៖ យោងតាមការចេញ ផ្សាយរបស់ rt នាវានិងយន្តហោះចម្បាំង របស់បញ្ជាការកណ្តាលអាមេរិក នៅតំបន់អាហ្វ្រិកបានទម្លាក់គ្រាប់ បែកលើទីតាំងជាច្រើនកន្លែង នៅក្នុងផ្នែកដែលគ្រប់គ្រងដោយពួក Houthi នៃប្រទេសយេមែន រួមទាំងរដ្ឋធានីសាណា និងកំពង់ផែ Hodeidah ផងដែរ។
គួរឲ្យដឹងដែរថាក្រុម Houthis គឺជាក្រុម Shia ដែលរៀបចំខ្លួនជារដ្ឋាភិបាលយេមែន និងជាអ្នកគ្រប់គ្រងនៅភាគ ពាយព្យនៃប្រទេស។ ពួកគេបានរារាំង ការដឹកជញ្ជូនរបស់អ៊ីស្រាអែល និងលោកខាងលិចនៅក្នុងសមុទ្រ ក្រហមអស់រយៈពេលជិតមួយឆ្នាំ មកហើយដើម្បីដាក់សម្ពាធលើអ៊ីស្រាអែល ឱ្យបញ្ឈប់ការវាយប្រហារលើតំបន់ហ្គាហ្សា។
យោងតាមយោធាអាមេរិក ការវាយប្រហារបានកំណត់គោលដៅក្រុម Houthi ចំនួន១៥លើកនៅរសៀលថ្ងៃសុក្រ ដោយបន្តបន្ទាប់ពីការវាយ លុកសមត្ថភាពយោធា ក្នុងគោលបំណង ការពារសេរីភាពនៃការធ្វើនាវាចរណ៍ និងធ្វើឱ្យដែនទឹកអន្តរជាតិ មានសុវត្ថិភាព និងសុវត្ថិភាពជាងមុន សម្រាប់សហរដ្ឋអាមេរិក សម្ព័ន្ធ និងព្រមទាំងនាវាជំនួញផងដែរ ។
នៅមុនពេលដែលបានចេញសេចក្តីថ្លែងការណ៍ ផ្លូវការពីបញ្ជាការកណ្តាល អាមេរិកនៅតំបន់អាហ្វ្រិក CENTCOM មន្ត្រីអាមេរិកដែលមិនបញ្ចេញឈ្មោះ បានប្រាប់ក្រុមអ្នកកាសែតថា ការវាយប្រហារបានកើតឡើងប្រឆាំងនឹងប្រព័ន្ធអាវុធ មូលដ្ឋាន និងឧបករណ៍ផ្សេងទៀតដែលស្ថិតនៅទីតាំងចំនួនប្រាំ។
ដោយឡែកបើយោង តាមប្រព័ន្ធផ្សព្វផ្សាយយេមែន មានការវាយប្រហារ ចំនួន៧លើកនៅព្រលានយន្តហោះ Hodeidah និងមូលដ្ឋានយោធានៅ Katheib ហើយ ការផ្ទុះ២ដងត្រូវបានគេរាយការណ៍ នៅក្នុងខេត្ត Dhamar និងបីនៅក្នុងខេត្ត Bayda ភាគអាគ្នេយ៍នៃទីក្រុងសាណាចំណែកឯការវាយប្រហារចំនួន៤ទៀត បានកំណត់គោលដៅរដ្ឋធានីនៃប្រទេសយេមែនតែម្តង៕
ប្រែសម្រួល៖ស៊ុនលី
