បរទេស៖ ប្រធានាធិបតីអាមេរិកលោក Joe Biden បាននិយាយថា កងកម្លាំងអ៊ុយក្រែនគួរតែ វាយប្រហារទាហានកូរ៉េខាងជើង “ប្រសិនបើពួកគេឆ្លងចូលទៅក្នុងប្រទេសអ៊ុយក្រែន” ដោយលោកបានអត្ថាធិប្បាយលើការចោទប្រកាន់ថា ទីក្រុងព្យុងយ៉ាងបានបញ្ជូនទាហាន ទៅដាក់ពង្រាយជាមួយយោធារុស្ស៊ី។
យោងតាមសារព័ត៌មាន RT ចេញផ្សាយនៅថ្ងៃទី៣០ ខែតុលា ឆ្នាំ២០២៤ បានឱ្យដឹងថា មន្ទីរបញ្ចកោណបានអះអាងនៅសប្តាហ៍នេះថា ទាហានប្រហែល ១០.០០០ នាក់មកពីកូរ៉េខាងជើងបាន មកដល់ប្រទេសរុស្ស៊ីហើយ។ ទាហានមួយចំនួនត្រូវបានគេអះអាងថា កំពុងត្រូវបានដឹកជញ្ជូនសម្រាប់ ការដាក់ពង្រាយដែលអាចមាន ប្រឆាំងនឹងកងទ័ពអ៊ុយក្រែននៅក្នុងតំបន់ Kursk របស់រុស្ស៊ី ជាកន្លែងដែលផ្នែកខ្លះនៃកងកម្លាំងរបស់ទីក្រុងគៀវ នៅតែមានបន្ទាប់ពីចាប់ផ្តើម ការលុកលុយក្នុងខែសីហា។
នៅពេលត្រូវបានសាកសួរដោយ ប្រព័ន្ធផ្សព្វផ្សាយកាលពីថ្ងៃអង្គារ ថាតើទីក្រុងគៀវគួរតែ “វាយបកវិញ” ប្រឆាំងនឹងកងទ័ពកូរ៉េខាងជើងឬយ៉ាងណានោះ លោក Biden បានឆ្លើយតបថា “ប្រសិនបើពួកគេឆ្លងចូលទៅក្នុងអ៊ុយក្រែនមែននោះ” ។ លោកមិនបានបញ្ជាក់ពីជំហររបស់អាមេរិកទេ ប្រសិនបើកងទ័ពនៅតែស្ថិតនៅក្នុងអ្វី ដែលក្រុងវ៉ាស៊ីនតោនទទួលស្គាល់ថា ជាទឹកដីរុស្ស៊ី។
ទីក្រុងម៉ូស្គូ និងក្រុងព្យុងយ៉ាងបានចុះហត្ថលេខាលើ សន្ធិសញ្ញាទ្វេភាគីកាលពីដើមឆ្នាំនេះ ដែលផ្តល់ជំនួយយោធាឱ្យគ្នាទៅវិញទៅមក ក្នុងករណីមានការវាយប្រហារដោយភាគីទីបី។ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានបដិសេធមិនបញ្ជាក់ ឬបដិសេធរបាយការណ៍អំពីវត្តមាន របស់ទាហានកូរ៉េខាងជើងនៅក្នុងប្រទេសរុស្ស៊ី។ លោកបាននិយាយនៅក្នុងបទសម្ភាសន៍មួយ កាលពីសប្តាហ៍មុនថា អ្វីដែលប្រទេសទាំងពីរធ្វើដើម្បីបំពេញកាតព្វកិច្ច របស់ពួកគេក្រោមកិច្ចព្រមព្រៀងថ្មី គឺរវាងពួកគេតែម្នាក់ឯង ៕
ប្រែសម្រួលៈ ណៃ តុលា
