បរទេស៖ មេដឹកនាំពិភពលោក បានផ្តល់ការអបអរ សាទរ ដល់លោក Donald Trump នៅពេលដែលលោក បានទទួលជ័យជម្នះ នៅព្រឹកថ្ងៃពុធនៅក្នុងការបោះឆ្នោត ប្រធានាធិបតីសហរដ្ឋអាមេរិកឆ្នាំ ២០២៤។
យោងតាមសារព័ត៌មាន VOA ចេញផ្សាយនៅថ្ងៃទី៦ ខែវិច្ឆិកា ឆ្នាំ២០២៤ថា លោក Trump បានផ្តួលគូប្រជែង មកពីគណបក្សប្រជាធិបតេយ្យ លោកស្រី Kamala Harris ដែលជាការត្រលប់មកវិញ ផ្នែកនយោបាយជាប្រវត្តិសាស្ត្រ សម្រាប់អតីតប្រធានាធិបតីបក្ស សាធារណរដ្ឋ បន្ទាប់ពីចេញពីតំណែងរយៈពេល ៤ឆ្នាំ។
នៅព្រឹកថ្ងៃពុធ មេដឹកនាំពិភពលោកជាច្រើនបានចូលទៅកាន់គេហទំព័រប្រព័ន្ធផ្សព្វផ្សាយសង្គម X ដើម្បីអបអរសាទរលោក Trump ដែលគោល នយោបាយការ បរទេស ដែលមិនអាចទាយ ទុកជាមុនបាន “America First” បានធ្វើឱ្យទំនាក់ទំនង ស្មុគស្មាញ ជាមួយសម្ព័ន្ធមិត្ត និងសត្រូវជាច្រើន របស់សហរដ្ឋអាមេរិក ដូចគ្នាក្នុងអំឡុងពេល អាណត្តិដំបូង របស់គាត់នៅក្នុងតំណែង។
នាយករដ្ឋមន្ត្រីអ៊ីស្រាអែល Benjamin Netanyahu គឺជាសម្ព័ន្ធមិត្តដំបូង បង្អស់ របស់សហរដ្ឋអាមេរិក ដែលបានផ្ញើ សារគាំទ្រ ដោយសរសើរ “ការត្រឡប់មកវិញជាប្រវត្តិសាស្ត្រ” របស់លោក Trump ដែលគាត់បាននិយាយថា ផ្តល់នូវ “ការប្តេជ្ញាចិត្តដ៏មានឥទ្ធិពលចំពោះសម្ព័ន្ធភាពដ៏អស្ចារ្យរវាងអ៊ីស្រាអែល និងអាមេរិក” ។
ប្រធានអាជ្ញាធរប៉ាឡេស្ទីន លោក Mahmoud Abbas ក្នុងសារអបអរសាទរ បាននិយាយថា រដ្ឋាភិបាលរបស់លោកនឹង “រក្សាជំហរ” ក្នុងការប្តេជ្ញាចិត្តរបស់ខ្លួនចំពោះសន្តិភាព ហើយមានទំនុកចិត្តថា សហរដ្ឋអាមេរិកនឹងគាំទ្រ សេចក្តីប្រាថ្នាស្របច្បាប់ របស់ប្រជាជនប៉ាឡេស្ទីន។
ប្រទេសកាតា ដែលជាអ្នក សម្រុះសម្រួលដ៏សំខាន់ នៅក្នុងកិច្ចចរចាបទ ឈប់បាញ់នៅតំបន់ហ្គាហ្សា និងកិច្ចព្រមព្រៀង ដោះលែងចំណាប់ខ្មាំង បានបន្តអបអរសាទរដល់លោក Trump ។ លោក Sheikh Tamim bin Hamad Al Thani មេដឹកនាំរបស់ប្រទេសកាតា បាននិយាយថា លោកទន្ទឹងរង់ចាំធ្វើការជា មួយសហរដ្ឋអាមេរិក ដើម្បីលើកកម្ពស់សន្តិសុខ និងស្ថិរភាពទាំងក្នុងតំបន់ និងសកលលោក ។
ប្រធានាធិបតីតួកគីលោក Recep Tayyip Erdogan នៅក្នុងការបង្ហោះនៅលើ X បានអបអរសាទរ “មិត្ត” Trump របស់គាត់សម្រាប់ ការឈ្នះការ បោះឆ្នោតប្រធានាធិបតី សហរដ្ឋអាមេរិកបន្ទាប់ពី “ការប្រយុទ្ធដ៏អស្ចារ្យ” ។ លោកបានបន្ថែមថា លោកសង្ឃឹមថា វិបត្តិក្នុងតំបន់ និងពិភពលោក ជាពិសេសសង្រ្គាមនៅមជ្ឈិមបូព៌ា និងសង្រ្គាមរុស្ស៊ី-អ៊ុយក្រែន នឹងឈានដល់ទីបញ្ចប់ ៕
