ថៃ៖ សំណើច្បាប់លើកលែងទោសនឹងត្រូវបញ្ជូនទៅសភា ប៉ុន្តែគ្មានសំណើលើកលែងទោសចំពោះបទល្មើសប្រមាថព្រះមហាក្សត្រឡើយ

បរទេស៖ លោក ជូសាក់ សិរីនីល (Chousak Sirinil) រដ្ឋមន្ត្រីទីស្តីការនាយករដ្ឋមន្ត្រីបាននិយាយថា គណបក្សភឿថៃដែលកំពុងកាន់អំណាចរំពឹងថា នឹងដាក់សំណើច្បាប់លើកលែងទោសដល់សភា រួមជាមួយនឹងកំណែផ្សេងទៀតពីគណបក្សផ្សេងទៀតនៅថ្ងៃទី១២ ខែធ្នូ នៅពេលដែលកិច្ចប្រជុំសភាបន្ទាប់ចាប់ផ្តើម។

យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី១២ ខែវិច្ឆិកា ឆ្នាំ២០២៤ បានឱ្យដឹងថា លោក ជូសាក់ អ្នកជំនាញច្បាប់របស់គណបក្សភឿថៃ និងជាប្រធានគណៈកម្មាធិការសភាដែលកំពុងសិក្សាលើច្បាប់លើកលែងទោសបាននិយាយកាលពីថ្ងៃចន្ទថា ក្រុមអ្នកច្បាប់របស់គណបក្សកំពុងរៀបចំច្បាប់លើកលែងទោសនេះ ខណៈដែលលោកទទួលស្គាល់ថា ដំណើរការបែបនេះមានការលំបាកព្រោះក្រុមត្រូវតែសម្រេចចិត្តថាតើប្រភេទនយោបាយបទល្មើសបែបណា គួរតែត្រូវបានលើកលែងទោស។

លោកក៏បានរំលឹកឡើងវិញនូវការសម្រេចរបស់គណបក្សភឿថៃថា សេចក្តីស្នើច្បាប់របស់គណបក្សភឿថៃនឹងមិនរាប់បញ្ចូលបទល្មើសនៅក្រោមមាត្រា ១១២ នៃក្រមព្រហ្មទណ្ឌ ឬហៅថាច្បាប់ប្រមាថ និងមាត្រា ១១០ នៃច្បាប់ដូចគ្នានោះទេ។

លោក ជូសាក់ បាននិយាយថា “សេចក្តីស្នើច្បាប់របស់គណបក្សភឿថៃ ត្រូវបានគេរំពឹងថា នឹងដាក់ជូនសភានៅថ្ងៃទី១២ ខែធ្នូ នៅពេលដែលសម័យប្រជុំថ្មីចាប់ផ្តើម” ដោយបន្ថែមថា សេចក្តីស្នើច្បាប់លើកលែងទោសចំនួនបួនផ្សេងទៀត ដែលស្នើដោយគណបក្សផ្សេងទៀត រួមទាំងគណបក្សប្រជាជន (PP) ដែលជាបក្សប្រឆាំង ក៏នឹងត្រូវដាក់ជូនទៅសភានៅថ្ងៃនោះផងដែរ។

កាលពីថ្ងៃទី ១៤ខែតុលា សភាតំណាងរាស្រ្តបានច្រានចោលសំណើដាក់បញ្ចូលការប្រមាថព្រះមហាក្សត្រនៅក្នុងបញ្ជីនៃបទល្មើសដែលត្រូវបានលើកលែងទោសក្រោមច្បាប់លើកលែងទោសនយោបាយថ្មី ដោយមានសមាជិកសភាចំនួន ២៧០ នាក់បានបោះឆ្នោតប្រឆាំងនឹងការដាក់បញ្ចូលបទល្មើសនេះ ខណៈដែលសមាជិកសភា ១៥២រូប បានបោះឆ្នោតគាំទ្រការជំរុញនេះ៕