បរទេស៖ ប្រទេសវៀតណាមបាននិយាយថា កម្មវិធី App លក់រាយតាមអ៊ីនធឺណិតរបស់ចិន Shein និង Temu ចាំបាច់ត្រូវចុះឈ្មោះជាមួយរដ្ឋាភិបាល មុនដំណាច់ខែវិច្ឆិកានេះ បើមិនដូច្នោះទេវានឹងបិទដែនអ៊ីនធឺណែត និងកម្មវិធីរបស់ពួកគេមិន ឱ្យប្រើប្រាស់នៅក្នុងប្រទេសវៀតណាម។
យោងតាមសារព័ត៌មាន VOA ចេញផ្សាយនៅថ្ងៃទី១១ ខែវិច្ឆិកា ឆ្នាំ២០២៤ បានឱ្យដឹងថា រដ្ឋាភិបាល និងអាជីវកម្មក្នុង ស្រុករបស់វៀតណាម បានសម្តែងការព្រួយបារម្ភអំពីផលប៉ះពាល់ នៃវេទិកាអនឡាញរបស់ចិន នៅលើទីផ្សារក្នុងស្រុក ដោយសារតែការបញ្ចុះតម្លៃយ៉ាងច្រើន។ ក្រសួងពាណិជ្ជកម្មវៀតណាម ក៏បាននិយាយដែរថា ខ្លួនមានការព្រួយបារម្ភអំពីសក្តានុពលសម្រាប់ការលក់ទំនិញក្លែងក្លាយ។
លោក Nguyen Hoang Long អនុរដ្ឋមន្ត្រីពាណិជ្ជកម្មវៀតណាមបានប្រាប់កិច្ចប្រជុំរដ្ឋាភិបាលកាលពីចុងសប្តាហ៍ថា ក្រសួងបានធ្វើការជាមួយទាំង Shein និង Temu លើបញ្ហាអាជ្ញាប័ណ្ណ។
លោក Long បាននិយាយនៅក្នុងសេចក្តីថ្លែងការណ៍របស់រដ្ឋាភិបាលថា “បន្ទាប់ពីការជូនដំណឹងរបស់ក្រសួង ប្រសិនបើវេទិកាទាំងនេះមិនអនុវត្តតាម នោះក្រសួងឧស្សាហកម្ម និងពាណិជ្ជកម្មនឹងសម្របសម្រួលជាមួយភ្នាក់ងារពាក់ព័ន្ធ ដើម្បីអនុវត្តវិធានការបច្ចេកទេសដូចជាការទប់ស្កាត់កម្មវិធី និងដែនគ្រប់គ្រង”។
កម្មវិធី App Shein និង Temu មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។ អ្នកលក់រាយម៉ូតរហ័ស Shein បាននឹងកំពុងលក់ទៅប្រទេសវៀតណាមយ៉ាងហោចណាស់ ២ ឆ្នាំ ហើយ ខណៈពេលដែលក្រុមហ៊ុន Temu ដែលជាកម្មសិទ្ធិរបស់ក្រុមហ៊ុន e-commerce យក្សរបស់ចិន PDD Holdings បានចាប់ផ្តើមអនុញ្ញាត ឱ្យអ្នកប្រើប្រាស់នៅក្នុង ប្រទេសវៀតណាមទិញទំនិញកាលពីខែមុន។
វៀតណាមអនុញ្ញាតឱ្យទំនិញ នាំចូលតម្លៃរហូតដល់ ៤០ ដុល្លាររួចផុតពីពន្ធលើតម្លៃបន្ថែម ។ ក្រសួងហិរញ្ញវត្ថុវៀតណាម បាននិយាយថា ទំនិញភាគច្រើន ដែលទទួលបាន អត្ថប្រយោជន៍ពីការផ្តាច់ពន្ធនេះ ត្រូវបាននាំចូលតាមរយៈវេទិកា ពាណិជ្ជកម្មអេឡិចត្រូនិក ហើយខ្លួនកំពុងពិចារណា បញ្ចប់ការផ្តាច់ពន្ធនេះ៕
ប្រែសម្រួលៈ ណៃ តុលា
