បរទេស៖ ខ្សែប្រយុទ្ធ Nguyen Xuan Nam (PVF-CAND) ត្រូវបានកីឡាករ Vu Van Son (យុវជនទីក្រុងហូជីមិញ) ដាល់ បណ្តាលឱ្យឈាមបបូរមាត់ បន្ទាប់ពីការប្រកួតក្នុងជុំទី៤ នៃការប្រកួតក្របខណ្ឌ First Division 2024-2025 ។
យោងតាមសារព័ត៌មាន VN EXPRESS ចេញផ្សាយកាលពីថ្ងៃទី១៤ ខែវិច្ឆិកា ឆ្នាំ២០២៤ បានឱ្យដឹងថា ក្នុងការប្រកួតនេះ កីឡាករ Xuan Nam លេងជាខ្សែប្រយុទ្ធ ចំណែកកីឡាករ Van Son លេងជាខ្សែការពារ ដូច្នេះពួកគេតែងតែជួបប្រទះនឹងគ្នាជាញឹកញាប់ ដែលនាំឱ្យមានបញ្ហា។
ក្រោយចប់ការប្រកួតស្មើ ០-០ កីឡាករទាំងពីរបានដើរបញ្ច្រាសទិសគ្នាមកជួបគ្នានៅខាងមុខសាលអាជ្ញាកណ្តាល។
យោងតាមកាមេរ៉ាសុវត្ថិភាព កីឡាករ Xuan Nam បាននិយាយអ្វីមួយ ហើយបន្ទាប់មកបានរុញ Van Son នៅមុខ។ កីឡាករមកពីក្រុមយុវជនហូជីមិញបានបញ្ចេញប្រតិកម្មភ្លាមៗដែលនាំឱ្យមានការប៉ះទង្គិចគ្នារវាងភាគីទាំងពីរ។
វាបានយកការអន្តរាគមន៍ពីកម្លាំងសន្តិសុខ និងកីឡាករពីភាគីទាំងសងខាង ដើម្បីឲ្យអ្នកទាំងពីរបែកគ្នា។ ហេតុការណ៍ប៉ះទង្គិចគ្នានេះមានរយៈពេលប្រហែលប្រាំវិនាទី។
រូបថតនៅលើទំព័រអ្នកគាំទ្ររបស់ PVF-CAND ក្រោយមកបានបង្ហាញឱ្យឃើញ កីឡាករ Xuan Nam ហូរឈាមយ៉ាងច្រើនចាប់ពីច្រមុះចុះ។ អ្នកលេងក្រុមក្រៅដីបាននិយាយថា ការឈ្លោះប្រកែកគ្នាក្នុងអំឡុង និងក្រោយការប្រកួតគឺជារឿងធម្មតា ប៉ុន្តែគាត់មិននឹកស្មានថា “ត្រូវគូប្រកួតវាយដល់ថ្នាក់នេះទេ” ។
គ្រូបង្វឹក Tran Duy Quang របស់ Tre TP HCM បាននិយាយថា គាត់មិនបានឃើញហេតុការវាយគ្នាដោយផ្ទាល់ទេ ប៉ុន្តែត្រូវបានប្រាប់ដោយកីឡាករក្នុងក្រុមថា ឧប្បត្តិហេតុកើតឡើងពីភាគីទាំងសងខាង ហើយ Xuan Nam គឺជាអ្នកដែលបានវាយមុន ដោយផ្គូផ្គងរូបភាពពីកាមេរ៉ាឃ្លាំមើល៕
ប្រែសម្រួលៈ ណៃ តុលា
