បរទេស ៖យោងតាមការចេញផ្សាយរបស់ RT ប្រព័ន្ធផ្សព្វផ្សាយជាច្រើន បានរាយការណ៍ថា ប្រទេសក្នុងតំបន់ Nordic ជាច្រើនបានផ្សព្វផ្សាយព័ត៌មាន ណែនាំប្រជាជន របស់ពួកគេអំពីរបៀបរៀបចំ សម្រាប់សង្គ្រាមដែលអាចកើតមាន ឬវិបត្តិដែលមិនរំពឹង ទុកផ្សេងទៀត។
ប្រទេសស៊ុយអែត បានចាប់ផ្តើមបញ្ជូន កូនសៀវភៅថ្មីៗ រាប់លានក្បាលក្នុងសប្តាហ៍នេះ ដែលមានចំណងជើងថា ក្នុងករណីមានវិបត្តិ ឬសង្រ្គាម ដែលខិតប័ណ្ណនៅឆ្នាំនេះ មានទំហំធំជាងការបោះ ពុម្ពលើកចុងក្រោយពីរដង ដោយសារអ្វីដែលរដ្ឋាភិបាល ពិពណ៌នាថាជាស្ថានភាព សន្តិសុខកាន់តែអាក្រក់ ដោយសារជម្លោះអ៊ុយក្រែន។
លោក Mikael Frisell នាយកទីភ្នាក់ងារ ទំនាក់ទំនងស៊ីវិល នៃប្រទេសស៊ុយអែត បាននិយាយថា៖ស្ថានភាព សន្តិសុខគឺធ្ងន់ធ្ងរ ហើយយើងទាំងអស់គ្នាត្រូវពង្រឹងភាពធន់របស់យើង ដើម្បីប្រឈមមុខនឹងវិបត្តិផ្សេងៗ និងចុងក្រោយសង្គ្រាមតែម្តង។
ក្នុងនោះផងដែរប្រទេសហ្វាំងឡង់ បានបើកដំណើរការគេហទំព័រថ្មី មួយស្តីពីការរៀបចំសម្រាប់ឧប្បត្តិហេតុ និងវិបត្តិ ខណៈដែលជនជាតិន័រវេស ត្រូវបានគេរាយការណ៍ថា បានចាប់ផ្តើមទទួលខិតប័ណ្ណជំរុញ ឱ្យពួកគេត្រៀមខ្លួន ដើម្បីគ្រប់គ្រង ដោយខ្លួនឯង សម្រាប់រយៈពេលមួយសប្តាហ៍ នៅក្នុងព្រឹត្តិការណ៍ នៃអាកាសធាតុខ្លាំង សង្រ្គាម ឬការគំរាមកំហែងផ្សេងទៀត។
គួរឲ្យដឹងដែរថាសៀវភៅ និងវេបសាយមគ្គុទ្ទេសផ្សេងទៀត រួមមានការណែនាំអំពីអ្វី ដែលត្រូវធ្វើក្នុង ករណីមានសេណារីយ៉ូជាច្រើន ហើយសុំឱ្យប្រជាពលរដ្ឋត្រូវប្រាកដថា ពួកគេអាចថែរក្សាខ្លួនឯងបាន យ៉ាងហោចណាស់ជា បឋមក្នុងករណីមានវិបត្តិ ៕
ប្រែសម្រួល៖ស៊ុនលី
