រីយ៉ូ៖ មេដឹកនាំនៃក្រុមសេដ្ឋកិច្ចទាំង២០ ហៅកាត់ថា G20 បានចាប់ផ្តើមកិច្ចប្រជុំរយៈពេលពីរថ្ងៃកាលពីថ្ងៃចន្ទ ក្នុងប្រទេសប្រេស៊ីល ដើម្បីដោះស្រាយបញ្ហាប្រឈមជាសាកល រួមទាំងជម្លោះភូមិសាស្ត្រនយោបាយ និងការប្រែប្រួលអាកាសធាតុ មុនពេលការវិលត្រឡប់ របស់លោក ដូណាល់ ត្រាំ ជាប្រធានាធិបតី សហរដ្ឋអាមេរិក ក្នុងខែមករា។
មេដឹកនាំបានប្រមូលផ្តុំគ្នា នៅពេលដែលការត្រលប់មកវិញ របស់លោក ត្រាំ រំលឹកឡើងវិញនូវការចងចាំ ពីការរំខានរបស់ លោកចំពោះ G20 និងក្របខ័ណ្ឌពហុភាគីផ្សេងទៀតក្នុងអំឡុងពេលអាណត្តិដំបូងរបស់លោក នៅពេលដែលជំហរ “America First” របស់លោកបានសាកល្បង ឯកភាពអន្តរជាតិ ហើយការឱបក្រសោប នៃការគាំពារនិយមរបស់លោក ក៏បានបន្ថែមស្រទាប់ នៃភាពមិនប្រាកដប្រជា ដល់សេដ្ឋកិច្ចពិភពលោកផងដែរ។
នាយករដ្ឋមន្ត្រីជប៉ុនលោក Shigeru Ishiba ដែលកំពុង ចូលរួមកិច្ចប្រជុំកំពូល G20 ជាលើកដំបូងចាប់តាំងពីចូល កាន់តំណែងក្នុងខែតុលា បានឲ្យដឹងថា ពិភពលោកកំពុងប្រឈមមុខនឹងបញ្ហាប្រឈម ដែលមិនអាចដោះស្រាយបាន ដោយលើកឡើងពីជម្លោះ ការប្រែប្រួលអាកាសធាតុ និងគ្រោះមហន្តរាយធម្មជាតិ។
លោកបានថ្លែងថា “ក្រោមកាលៈទេសៈបែបនេះ G20 ត្រូវតែស្វែងរកមូលដ្ឋានរួម ជាជាងការបែកបាក់គ្នា និងការប្រឈមមុខដាក់គ្នា ហើយស្វែងរកដំណោះស្រាយដោយផ្អែកលើទំនួលខុសត្រូវរួមគ្នា”។ កិច្ចប្រជុំ G20 នៅទីក្រុង Rio de Janeiro ប្រទេសប្រេស៊ីល កើតឡើងនៅពេលដែលជ័យជម្នះថ្មីៗនេះរបស់គណបក្សសាធារណរដ្ឋរបស់លោក ត្រាំ ដែលជាអ្នកតស៊ូមតិ នៃការដំឡើងពន្ធខ្ពស់លើការនាំចូល លើប្រទេសចិន បានបង្កើនភាពមិនប្រាកដប្រជាលើថា តើសេដ្ឋកិច្ចធំបំផុត របស់ពិភពលោក អាចសម្រេចបាននូវការចុះខ្សោយ ដែលរំពឹងទុកដោយអ្នកវិភាគ។
សម្រាប់ផ្នែករបស់ខ្លួន ប្រធាន G20 ឆ្នាំនេះ ប្រេស៊ីល បានផ្តល់អាទិភាព ក្នុងការប្រយុទ្ធប្រឆាំង នឹងភាពក្រីក្រ និងភាពអត់ឃ្លាន ពង្រឹងអភិបាលកិច្ចសកល និងលើកកម្ពស់ការអភិវឌ្ឍប្រកបដោយចីរភាព ។ ប្រធានាធិបតីប្រេស៊ីលលោក Luiz Inacio Lula da Silva បានពណ៌នាស្ថានភាព ពិភពលោកថា “ស្ថានភាពពិភពលោក នាពេលនេះ គឺអាក្រក់ជាងក្នុង អំឡុង វិបត្តិហិរញ្ញវត្ថុ ពិភពលោកឆ្នាំ២០០៨ ទៅទៀត”៕
ប្រែសម្រួល ឈូក បូរ៉ា
