បរទេស ៖ យោងតាមការចេញផ្សាយរបស់ RT នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រកាស ផ្តល់រង្វាន់ ចំនួន៥លានដុល្លារ ដល់ជនណា ដែលនាំចំណាប់ខ្មាំងម្នាក់ ដែលនៅរស់រានមានជីវិត ពីហ្គាហ្សាមកផ្ទះវិញ ហើយលោកបាន ធ្វើការសន្យានេះក្នុងអំឡុង ពេលបំពេញទស្សនកិច្ច ទៅកាន់ទីតាំងមួយកន្លែង របស់ជនប៉ាឡេស្ទីន កាលពីថ្ងៃអង្គារ។
រំលឹកដែរក្រុមសកម្មប្រយុទ្ធ ប៉ាឡេស្ទីន Hamas បានចាប់ខ្លួនមនុស្សជាង២៥០នាក់ នៅក្នុងការវាយឆ្មក់ដ៏សាហាវ របស់ខ្លួនលើភាគ ខាងត្បូងអ៊ីស្រាអែល ក្នុងខែតុលា ឆ្នាំ ២០២៣។
ក្នុងនោះចំណាប់ខ្មាំងខ្លះ ត្រូវបានប្រគល់មកវិញតាមរយៈការចរចា ឬសកម្មភាពយោធា ខណៈដែលអ្នកផ្សេងទៀត ត្រូវបានសម្លាប់ រួមទាំង ដោយយោធាអ៊ីស្រាអែលផងដែរហើយ គិតត្រឹមដើមខែវិច្ឆិកា ទីភ្នាក់ងារស៊ើបការណ៍ សម្ងាត់របស់អ៊ីស្រាអែល តាមសេចក្តីរាយការណ៍បានវាយតម្លៃថា មនុស្សរហូតដល់៥១នាក់ទៀតដែលនៅរស់រានមានជីវិត និងត្រូវបានឃុំខ្លួន ដោយពួកសកម្មប្រយុទ្ធ។
លោក Netanyahuក៏បានថ្លែងបែបនេះផងដែរ ក្រៅតែពីការផ្តល់ប្រាក់រង្វាន់ថា ៖ ខ្ញុំចង់និយាយទៅកាន់ អ្នកដែលចាប់ ចំណាប់ខ្មាំងរបស់យើង ថាអ្នកណាហ៊ាន ធ្វើបាបចំណាប់ខ្មាំងរបស់យើង អ្នកនោះនឹងត្រូវរ៉ាប់រង ការសងសង់ពីយើងវិញ ។ យើងនឹងតាមរកអ្នក ហើយយើងនឹងរកឃើញអ្នកឲ្យឃើញ។
គួរឲ្យដឹងដែរថាកាលពី២សប្តាហ៍មុន ប្រព័ន្ធផ្សព្វផ្សាយអ៊ីស្រាអែល ធ្លាប់បានរាយការណ៍ម្តងហើយថា លោក Netanyahu មានបំណងផ្តល់ប្រាក់លោះ ជាច្រើនលានដុល្លារក្នុង មួយចំណាប់ខ្មាំង និងការឆ្លងកាត់ដោយ សុវត្ថិភាពចេញពីហ្គាហ្សា ដល់នរណាម្នាក់ដែលមានបំណង ចង់ចរចាជាមួយរដ្ឋាភិបាលរបស់គាត់៕
ប្រែសម្រួល៖ស៊ុនលី
