រ៉ាម៉ាឡា៖ ប្រធានាធិបតីប៉ាឡេស្ទីន លោក Mahmoud Abbas បានឲ្យដឹងថា មធ្យោបាយតែមួយគត់ ដើម្បីបញ្ចប់ការកើនឡើង ដែលកំពុងបន្តនៅក្នុងតំបន់ គឺការដោះស្រាយបញ្ហាប៉ាឡេស្ទីន។
នៅក្នុងសុន្ទរកថារបស់លោក ដើម្បីប្រារព្ធទិវាសាមគ្គីភាពអន្តរជាតិ ជាមួយប្រជាជនប៉ាឡេស្ទីន ដែលត្រូវបានប្រារព្ធជារៀង រាល់ឆ្នាំនៅថ្ងៃទី២៩ ខែវិច្ឆិកា លោក Abbas បានឲ្យដឹងថា ការដោះស្រាយបញ្ហាប៉ាឡេស្ទីន តាមរយៈការដោះ ស្រាយភាពស្របច្បាប់អន្តរជាតិ គឺជាមធ្យោបាយតែមួយគត់ ដើម្បីកាត់បន្ថយភាពតានតឹងក្នុងតំបន់ និងធានាសន្តិភាព។
លោកបានបញ្ជាក់សារជាថ្មីអំពីសិទ្ធិ របស់ប្រជាជនប៉ាឡេស្ទីន ក្នុងការសម្រេចចិត្តដោយខ្លួនឯង សេរីភាព និងឯករាជ្យភាព នៅលើទឹកដីដូនតារបស់ពួកគេ និងគោលដៅរបស់ពួកគេ ក្នុងការបង្កើតរដ្ឋឯករាជ្យ មួយជាមួយនឹង ទីក្រុងយេរ៉ូសាឡឹម ខាងកើត ជារដ្ឋធានីរបស់ខ្លួន។
លោកប្រធានាធិបតី បានគូសបញ្ជាក់ពីការកាន់ កាប់របស់អ៊ីស្រាអែល ដែលកំពុងបន្តជាឧបសគ្គចម្បងចំពោះសន្តិភាព និងស្ថិរភាពនៅមជ្ឈិមបូព៌ា ដោយសង្កត់ធ្ងន់ថា ការកាន់កាប់នេះត្រូវតែបញ្ចប់ សម្រាប់ការបង្កើតរដ្ឋប៉ាឡេស្ទីន។
នៅក្នុងសុន្ទរកថារបស់លោក Abbas បានសង្កត់ធ្ងន់ លើតម្រូវការ សម្រាប់សហគមន៍អន្តរជាតិ ដើម្បីចាត់វិធានការយ៉ាង ម៉ឺងម៉ាត់ និងសំខាន់ ដើម្បីសម្រេចបាន នូវសន្តិភាពដ៏ត្រឹមត្រូវ និងទូលំទូលាយ ដែលស្របតាមច្បាប់អន្តរជាតិ និងគំនិតផ្តួចផ្តើមសន្តិភាពអារ៉ាប់៕
ប្រែសម្រួល ឈូក បូរ៉ា
