ព្រុចសែល៖ អត្រាអតិផរណាប្រចាំឆ្នាំរបស់តំបន់ចាយប្រាក់អឺរ៉ូ សម្រាប់ខែវិច្ឆិកាត្រូវបានគេរំពឹងថានឹងឈានដល់ ២,៣ភាគរយកើនឡើងពី ២ភាគរយនៅក្នុងខែតុលា នេះបើយោងតាមការប៉ាន់ប្រមាណ ដែលចេញផ្សាយកាលពីថ្ងៃសុក្រដោយ Eurostat ។
តម្លៃសេវាកម្មនៅតែជាកត្តាជំរុញចម្បងនៃអតិផរណានៅក្នុងតំបន់អឺរ៉ូ ជាមួយនឹងអតិផរណាពីមួយឆ្នាំទៅមួយឆ្នាំនៅ ៣,៩ភាគរយ និងអតិផរណាប្រចាំឆ្នាំ សម្រាប់អាហារ គ្រឿងស្រវឹង និងថ្នាំជក់នៅ ២,៨ភាគរយ។
ទំនិញឧស្សាហកម្មមិនមែនថាមពល បានចុះបញ្ជីអត្រាអតិផរណាប្រចាំឆ្នាំ ០,៧ភាគរយនៅក្នុងខែវិច្ឆិកា កើនឡើងពី ០,៥ ភាគរយនៅក្នុងខែមុន នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ក្នុងចំណោមប្រទេសក្នុងតំបន់ចាយប្រាក់អឺរ៉ូ បែលហ្ស៊ិកបានកត់ត្រាអត្រាអតិផរណាខ្ពស់បំផុតសម្រាប់ខែវិច្ឆិកាក្នុងអត្រា ៥ភាគរយតាមពីក្រោយដោយប្រទេសក្រូអាស៊ីចំនួន ៤ភាគរយ ទាំងអេស្តូនី និងហូឡង់មាន ៣,៤ភាគរយ។
សម្រាប់ប្រទេស ដែលមានសេដ្ឋកិច្ចធំ អត្រាអតិផរណារបស់ប្រទេសបារាំងក្នុងខែវិច្ឆិកា មានកម្រិត ១,៧ភាគរយ ខណៈដែលអតិផរណារបស់ប្រទេសអេស្ប៉ាញបានកើនឡើងដល់ ២,៤ ភាគរយ ហើយប្រទេសអាល្លឺម៉ង់នៅតែមានស្ថិរភាពនៅ ២,៤ភាគរយ៕
ប្រែសម្រួល ឈូក បូរ៉ា
