បរទេស ៖ យោងតាមការចេញផ្សាយរបស់ RT រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា ទីក្រុង Tehran នឹងពិចារណាលើការដាក់ពង្រាយ យោធាពេញលេញ ដើម្បីជួយស៊ីរី ប្រសិនបើរដ្ឋាភិបាល នៅទីក្រុង Damascus ស្នើសុំការងារនេះ។
ការអត្ថាធិប្បាយនេះ បានកើតឡើងក្នុងអំឡុងពេលកិច្ចសម្ភាសន៍មួយ ដែលលោក Araghchi បានផ្តល់ទៅឱ្យសារព័ត៌មានមួយ ដែលមានមូលដ្ឋាន នៅប្រទេសកាតា Al-Araby Al-Jadeed ក្នុងដំណើរត្រឡប់មកវិញពីប្រទេសតួគី កាលពីល្ងាចថ្ងៃចន្ទ ។
លោក Araghchi ត្រូវបានដកស្រង់សម្ដីបែបនេះថា៖ ប្រសិនបើរដ្ឋាភិបាលស៊ីរី ស្នើឲ្យអ៊ីរ៉ង់បញ្ជូនទាហានទៅស៊ីរី យើងនឹងពិចារណាលើសំណើនេះ ។ លោកបានបន្ថែមថា ទីក្រុងតេហរ៉ង់កំពុងរៀបចំជំហាន ជាបន្តបន្ទាប់ ដើម្បីធ្វើឲ្យស្ថានការណ៍ នៅស៊ីរីស្ងប់ស្ងាត់ និងស្វែងរកឱកាសមួយ ដើម្បីបង្ហាញគំនិតផ្តួចផ្តើម សម្រាប់ដំណោះស្រាយអចិន្ត្រៃយ៍នៅទីនោះ។
ក្រុមសកម្មប្រយុទ្ធ នៃសម្ព័ន្ធ អាល់កៃដា Hayat Tahrir-al-Sham (HTS) និងក្រុមអ៊ីស្លាមនិយមផ្សេងទៀត បានបើកការ វាយលុកទ្រង់ទ្រាយធំ ពីខេត្ត Idlib ឆ្ពោះទៅទីក្រុង Aleppo, Hama និង Homs កាលពីសប្តាហ៍មុន ប៉ុន្តែខេត្ត Idlibតែមួយគត់ ដែលស្ថិត ស្ថិតនៅក្រោមការការពារ របស់តួគីចាប់ តាំងពីបទឈប់បាញ់ ដែលបានចរចា ជាមួយរុស្ស៊ីក្នុងឆ្នាំ ២០២០។
មានន័យថាការវិវត្ត នៃក្រុមភេរវករទាំងនេះ នឹងអាចបង្កគ្រោះថ្នាក់ ដល់ប្រទេសជិត ខាងរបស់ស៊ីរី ដូចជាអ៊ីរ៉ាក់ ហ្ស៊កដានី និងប្រទេសតួគីផងដែរ ពោលគឺច្រើនជាងអ៊ីរ៉ង់ ៕
ប្រែសម្រួល៖ស៊ុនលី
