សេអ៊ូលៈ ក្រុមហ៊ុនសាជីវកម្មធំៗរបស់កូរ៉េខាងត្បូង បានបន្តមមាញឹកនៅថ្ងៃពុធនេះ ដើម្បីព្យាយាមវាយតម្លៃលក្ខខណ្ឌ អាជីវកម្មរបស់ខ្លួនចំពេលមានភាព មិនប្រាកដប្រជាបន្ទាប់ពីការប្រកាស រយៈពេលខ្លីនៃច្បាប់អាជ្ញាសឹក ដែលបានធ្វើឲ្យមានការប៉ះពាល់យ៉ាងខ្លាំង តាមទីផ្សារហិរញ្ញវត្ថុ។
តួអង្គសំខាន់ៗក្នុងវិស័យធុរកិច្ច រួមមាន Samsung Group ក្រុមហ៊ុន SK Group និង LG Group បានបើកកិច្ចប្រជុំបន្ទាន់ដើម្បីវាយតម្លៃ ពីផលប៉ះពាល់នៃវិបត្តិនយោបាយ លើប្រតិបត្តិការរបស់ពួកគេ នេះបើយោងតាមការចុះផ្សាយរបស់ ទីភ្នាក់ងារសារព័ត៌មានយុនហាប់។
ក្រុមប្រឹក្សា Supex របស់ SK ដែលជាស្ថាប័នធ្វើការសម្រេចចិត្តខ្ពស់បំផុត របស់ក្រុមបានកោះប្រជុំជាមួយ នាយកប្រតិបត្តិមកពីក្រុមហ៊ុនបុត្រសម្ព័ន្ធសំខាន់ៗ ខណៈដែល LG ក៏បានរៀបចំកិច្ចប្រជុំយុទ្ធសាស្ត្របន្ទាន់ ដើម្បីតាមដានការអភិវឌ្ឍន៍ ទីផ្សារហិរញ្ញវត្ថុផងដែរ។ បុគ្គលិក LG នៅទីស្នាក់ការកណ្តាលរបស់ក្រុម នៅជិតរដ្ឋសភាក្នុងទីក្រុងសេអ៊ូល ត្រូវបានគេណែនាំឱ្យធ្វើការពីចម្ងាយ ដោយសារភាពចលាចលនយោបាយ ដែលអាចកើតមាននៅក្នុងតំបន់នេះ។
មន្ត្រីម្នាក់នៅក្រុមហ៊ុនសំខាន់មួយបានឲ្យដឹងថា “ដោយសារប្រទេសកូរ៉េខាងត្បូង គឺជាប្រទេសសេដ្ឋកិច្ចដែលពឹងផ្អែកលើការនាំចេញយ៉ាងខ្លាំង ភាពចលាចលនយោបាយបានជះឥទ្ធិពលអវិជ្ជមាន ដល់ភាពជឿជាក់ខាងក្រៅរបស់ទីផ្សារហិរញ្ញវត្ថុ” ។ មន្ត្រីរូបនេះបានបន្ថែមថា “អស្ថិរភាពនយោបាយមិនគួររំខាន ដល់ស្ថិរភាពសេដ្ឋកិច្ចនោះទេ”។
ក្រុមអ្នកទទួលភ្ញៀវធំៗក៏កំពុងមមាញឹក ក្នុងការវាយតម្លៃផលប៉ះពាល់នៃច្បាប់អាជ្ញាសឹក លើអាជីវកម្មកូរ៉េខាងត្បូងផងដែរ។ សភាពាណិជ្ជកម្ម និងឧស្សាហកម្មកូរ៉េ បានបើកកិច្ចប្រជុំបន្ទាន់មួយ ដើម្បីពិភាក្សាអំពីវិធីធានាស្ថិរភាព អាជីវកម្មសម្រាប់ក្រុមហ៊ុន ៕
ប្រែសម្រួល ឈូក បូរ៉ា
