ម៉ានីល៖ ការិយាល័យរតនាគាររបស់ប្រទេសហ្វីលីពីន បានឲ្យដឹងកាលពីថ្ងៃអង្គារថា ប្រាក់បំណុលរបស់ប្រទេសហ្វីលីពីន បានកើនឡើងដល់ ១៦,០២ពាន់ពាន់លានប៉េសូ ស្មើនឹងប្រហែល២៧៣,៥៦ ពាន់លានដុល្លារសហរដ្ឋអាមេរិក គិតត្រឹមដំណាច់ខែតុលា ពោលគឺបានកើនឡើង ០,៨ភាគរយ ខ្ពស់ជាងកម្រិតតួលេខកាលពីចុងខែកញ្ញា ។
ការិយាល័យខាងលើបានសន្មតថា ការកើនឡើងនៃផលប៉ះពាល់ដោយផ្អែកលើ ការវាយតម្លៃនៃការធ្លាក់ថ្លៃប្រាក់ប៉េសូធៀបនឹង ប្រាក់ដុល្លារសហរដ្ឋអាមេរិក ។
ការិយាល័យដដែលនេះបានបញ្ជាក់ថា ៦៧,៩៨ភាគរយ នៃភាគហ៊ុនបំណុលសរុប ត្រូវបានចេញពីប្រភពក្នុងស្រុក ខណៈនៅសេសសល់ គឺមកពីប្រភពខាងក្រៅ ។
ការិយាល័យក៏បានបញ្ជាក់ដែរថា បំណុលពីខាងក្រៅរបស់ប្រទេសមានចំនួន ៥,១៣ពាន់ពាន់លានប៉េសូ ស្មើនឹងប្រហែល ៨៧,៨៩ពាន់លានដុល្លារ នៅក្នុងខែតុលា ពោលគឺខ្ពស់ជាង៣,៥ភាគរយធៀបនឹងខែមុន ។
ការិយាល័យខាងលើនេះបានឲ្យដឹងថា គិតចាប់តាំងពីខែមករា បំណុលពីខាងក្រៅរបស់ប្រទេសហ្វីលីពីន បានកើនឡើង ១១,៦ភាគរយ ៕
ប្រែសម្រួលដោយ៖ ម៉ៅ បុប្ផាមករា