បរទេស៖ អនុរដ្ឋមន្ត្រីការបរទេសអាមេរិក លោក Kurt Campbell បាននិយាយកាលពីថ្ងៃពុធថា ប្រធានាធិបតីកូរ៉េខាងត្បូង លោក Yoon Suk Yeol “បានសន្និដ្ឋានខុសយ៉ាងធ្ងន់ធ្ងរ” លើការសម្រេចចិត្តក្នុងការ ប្រកាសច្បាប់អាជ្ញាសឹកនៅសប្តាហ៍នេះ ហើយវាត្រូវបានគេមើលឃើញថា ជា “បញ្ហាយ៉ាងជ្រាលជ្រៅ” និង “មិនស្របច្បាប់” ។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី៥ ខែធ្នូ ឆ្នាំ២០២៤ បានឱ្យដឹងថា នៅពេលត្រូវបានសួរនៅក្នុងព្រឹត្តិការណ៍មួយ ដែលរៀបចំឡើងដោយវេទិកា Aspen Strategy Forum ថាតើវាជាការបរាជ័យផ្នែកស៊ើបការណ៍សម្ងាត់ ដែលទីក្រុងវ៉ាស៊ីនតោន មិនបានព្រមានជាមុនទៅលើ សម្ព័ន្ធមិត្តសំខាន់ឬអត់នោះ លោក Campbell បាននិយាយថា អ្នកប្រាស្រ័យទាក់ទងអាមេរិក ស្ទើរតែទាំងអស់នៅក្នុង ប្រទេសកូរ៉េខាងត្បូង រួមទាំងនៅក្នុងការិយាល័យប្រធានាធិបតី មានការភ្ញាក់ផ្អើលយ៉ាងខ្លាំងចំពោះទង្វើរបស់លោក Yoon ។
លោក Yoon បានប្រកាសច្បាប់អាជ្ញាសឹក កាលពីយប់ថ្ងៃអង្គារដើម្បីរារាំង “កងកម្លាំងប្រឆាំងរដ្ឋ” ក្នុងចំណោមគូប្រជែងនយោបាយ ក្នុងស្រុករបស់លោក ប៉ុន្តែបានលុបចោលការសម្រេចចិត្ត ប៉ុន្មានម៉ោងក្រោយមក បន្ទាប់ពីសមាជិកសភាបានច្រានចោល។
រដ្ឋមន្ត្រីការបរទេសអាមេរិកលោក Antony Blinken បានប្រាប់រ៉យទ័រក្នុងបទសម្ភាសន៍ មួយកាលពីថ្ងៃពុធថា សហរដ្ឋអាមេរិកដែលមានទាហានប្រហែល ២៨.៥០០ នាក់ឈរជើងនៅក្នុងប្រទេសកូរ៉េខាងត្បូង មិនបានដឹងពីចេតនារបស់លោក Yoon ក្នុងការប្រកាសច្បាប់អាជ្ញាសឹកនោះទេ។
ទីប្រឹក្សាសន្តិសុខជាតិរបស់ប្រធានាធិបតី Joe Biden គឺលោក Jake Sullivan ក្រោយមកបានប្រាប់ក្រុមអ្នកជំនាញ ផ្នែកប្រឹក្សាក្នុងទីក្រុងវ៉ាស៊ីនតោនថា សហរដ្ឋអាមេរិកបានដឹងពីវា “តាមកញ្ចក់ទូរទស្សន៍ តាមរបៀបដែលពិភពលោកទាំងមូលបានធ្វើ” ហើយ “វាបានបង្កើនការព្រួយបារម្ភយ៉ាងខ្លាំងសម្រាប់យើង” ៕
ប្រែសម្រួលៈ ណៃ តុលា
