បរទេស៖ យោងតាមការចេញផ្សាយរបស់ RT កងកម្លាំងប្រជាធិបតេយ្យស៊ីរីហៅកាត់ថាSDF ដែលជាសម្ព័ន្ធយោធាគាំទ្រដោយសហរដ្ឋអាមេរិក ដែលគ្រប់គ្រងដោយក្រុមឃឺដ បានដណ្តើមកាន់កាប់ទីក្រុង Deir ez-Zor ភាគខាងកើតប្រទេសស៊ីរី ។
ប្រភពសន្តិសុខចំនួនពីរ ដែលមានមូលដ្ឋាននៅភាគខាងកើតប្រទេសស៊ីរី តាមសេចក្តីរាយការណ៍ បានប្រាប់អ្នកសារព័ត៌មានថា SDF បានគ្រប់គ្រងទីក្រុងទាំងស្រុងនៅរសៀលថ្ងៃសុក្រ។កងកម្លាំង SDF ក៏ត្រូវបានគេរាយការណ៍ថា បានគ្រប់គ្រងសង្កាត់មួយចំនួនក្នុងទីក្រុង Aleppo ដែលត្រូវបានឡោមព័ទ្ធដោយក្រុមបះបោរអ៊ីស្លាម។
គួរឲ្យដឹងដែរថាសកម្មជនមកពីប្រព័ន្ធផ្សព្វផ្សាយក្នុងស្រុកដែលមានទំនាក់ទំនងនៅក្នុងទីក្រុងបានប្រាប់រ៉យទ័រថាកងកម្លាំងរដ្ឋាភិបាលស៊ីរីនិងយុទ្ធជនអ៊ីរ៉ាក់គាំទ្រដោយអ៊ីរ៉ង់បានដកខ្លួនចេញពី Deir ez-Zor មុនពេលដែល SDF វាយលុកចូល។
ដោយឡែកប្រភពសន្តិសុខ នៅប្រទេសអ៊ីរ៉ាក់ឯណោះវិញ បានអះអាងថា SDF ក៏ត្រូវបានគេរាយការណ៍ថា កំពុងឆ្ពោះទៅកាន់ទីប្រជុំជន Albukamal របស់ប្រទេសស៊ីរីផងដែរ ដោយបានកត់សម្គាល់ថា ទីក្រុងជាប់ព្រំដែនអាចត្រូវបានរឹបអូស ក្នុងរយៈពេល ២៤ម៉ោងខាងមុខនេះ៕
ប្រែសម្រួល៖ ស៊ុន លី
