យេរ៉ូសាឡឹម៖ កងកម្លាំងការពារអ៊ីស្រាអែល (IDF) និងទីភ្នាក់ងារសន្តិសុខអ៊ីស្រាអែល បានប្រកាសថា ពួកគេបានសម្លាប់លោក Nidal Al-Najar ដែលជាប្រធានអង្គភាពការពារដែនអាកាសរបស់ក្រុមហាម៉ាស់ នៅទីក្រុងហ្គាហ្សា។
លោក Al-Najar ត្រូវបានគេកំណត់អត្តសញ្ញាណថាជាអ្នករៀបចំការជ្រៀតចូលតាមអាកាសចូលក្នុងទឹកដីអ៊ីស្រាអែលកាលពីថ្ងៃទី០៧ ខែតុលា ឆ្នាំមុន នេះបើតាមសេចក្តីថ្លែងការណ៍រួម។
សេចក្តីថ្លែងការណ៍បានពណ៌នាលោក Al-Najar ជាតួអង្គសំខាន់ក្នុងការវាយប្រហារលើកងកម្លាំងអ៊ីស្រាអែល និង IDF រួមទាំងប្រតិបត្តិការយន្តហោះដ្រូនសំដៅលើកងទ័ពនៅតំបន់ហ្គាហ្សាភាគកណ្តាល។
ដោយឡែក IDF បានលាតត្រដាងកាលពីថ្ងៃសុក្រថា កងកម្លាំងរបស់ខ្លួនបានរកឃើញ និងរុះរើកំណាត់ផ្លូវរូងក្រោមដី ដែលជាប់គាំងក្នុងអំឡុងពេលប្រតិបត្តិការនៅក្នុងទីក្រុងរ៉ាហ្វា ដែលជាទីក្រុងមួយនៅភាគខាងត្បូងតំបន់ហ្គាហ្សា ។ ផ្លូវរូងក្រោមដី ដែលត្រូវបានរចនាឡើង ដើម្បីកំណត់គោលដៅកងកម្លាំងអ៊ីស្រាអែល ត្រូវបានរកឃើញរួមជាមួយនឹងហេដ្ឋារចនាសម្ព័ន្ធប្រយុទ្ធយ៉ាងទូលំទូលាយ។
អ៊ីស្រាអែល បាននឹងកំពុងបើកការវាយលុកទ្រង់ទ្រាយធំប្រឆាំងនឹងក្រុមហាម៉ាស់ នៅតំបន់ហ្គាហ្សា ដើម្បីសងសឹកប្រឆាំងនឹងការវាយលុករបស់ក្រុមហាម៉ាស់ឆ្លងកាត់ព្រំដែនភាគខាងត្បូងអ៊ីស្រាអែលកាលពីថ្ងៃទី០៧ ខែតុលា ឆ្នាំ២០២៣ ក្នុងអំឡុងពេលដែលមនុស្សប្រហែល ១២០០ នាក់ត្រូវបានសម្លាប់ និងប្រហែល ២៥០នាក់ទៀតត្រូវបានចាប់ធ្វើជាចំណាប់ខ្មាំង៕
ប្រែសម្រួល ឈូក បូរ៉ា
