បរទេស៖ យោងតាមការចេញផ្សាយរបស់ RT ប្រធានាធិបតីកូរ៉េខាងត្បូង លោក Yoon Suk Yeol បាននិយាយថា លោកមានការសោកស្ដាយជាខ្លាំងចំពោះការប្រកាសដាក់ច្បាប់អាជ្ញាសឹកនៅក្នុងប្រទេស ហើយបានប្តេជ្ញាថានឹងមិនធ្វើសកម្មភាពនេះម្តងទៀតឡើយ។
លោក Yoon បានថ្លែងការសុំទោសរបស់គាត់នៅក្នុងសុន្ទរកថារយៈពេលពីរនាទី ទៅកាន់ពលរដ្ឋទូទាំងប្រទេសកាលពីថ្ងៃសៅរ៍ ដែលជាការបង្ហាញជាសាធារណៈលើកដំបូងរបស់គាត់ ចាប់តាំងពីមានវិបត្តិបានផ្ទុះឡើងក្នុងប្រទេសកាលពីដើមសប្តាហ៍នេះ។
លោក Yoon បានអះអាងថា៖ ការប្រកាសច្បាប់អាជ្ញាសឹកជាបន្ទាន់នេះកើតចេញពីការអស់សង្ឃឹមរបស់ខ្ញុំ ក្នុងនាមជាភាគីទទួលខុសត្រូវចុងក្រោយសម្រាប់កិច្ចការរដ្ឋ។
ប្រធានាធិបតីដដែលរូបនេះក៏បានទទួលស្គាល់ថាការសម្រេចចិត្តរបស់លោកថា បានបង្កឱ្យមានការព្រួយបារម្ភ និងការរអាក់រអួលដល់ប្រជាជនកូរ៉េខាងត្បូងផងដែរ។ លោកបានសង្កត់ធ្ងន់ថា៖ខ្ញុំមានការសោកស្ដាយជាខ្លាំង និងសូមទោសដោយស្មោះចំពោះពលរដ្ឋ ដែលត្រូវបានតក់ស្លុតជាខ្លាំងចំពោះហេតុការណ៍នេះ។
លើសពីនេះលោក Yoon បានច្រានចោលការរំពឹងទុកដែលថាគាត់អាចព្យាយាមដាក់ច្បាប់អាជ្ញាសឹកសាជាថ្មីម្តងទៀតដោយនិយាយថា នឹងមិនមានការប៉ុនប៉ងលើកទីពីរក្នុងការធ្វើវិសោធនកម្មរដ្ឋធម្មនុញ្ញជាដាច់ខាត៕
ប្រែសម្រួល៖ ស៊ុនលី
