តូក្យូ៖ ក្រុមហ៊ុន Nippon Steel Corp. បានសន្យាថា នឹងផ្តល់ប្រាក់ចំនួន ៥ពាន់ដុល្លារដល់បុគ្គលិកក្រុមហ៊ុន Steel Corp. របស់សហរដ្ឋអាមេរិកក្នុងម្នាក់ៗជា “ប្រាក់រង្វាន់បិទ” មួយដង ប្រសិនបើក្រុមហ៊ុនផលិតដែកជប៉ុន ត្រូវបានអនុញ្ញាតឱ្យបញ្ចប់ការ ទិញយកក្រុមហ៊ុនអាមេរិក ដ៏ចម្រូងចម្រាសរបស់ខ្លួន។
ការប្រកាសនេះធ្វើឡើងស្របពេលដែលប្រធានាធិបតី សហរដ្ឋអាមេរិកលោក ចូ បៃដិន ត្រូវបានគេរាយការណ៍ថា គ្រោងនឹងបិទជាផ្លូវការនូវការទិញយកតម្លៃ ១៤,១ ពាន់លានដុល្លារលើមូលដ្ឋាន សន្តិសុខជាតិ ដែលអាចនឹងកើតមានក្នុងខែនេះ។
លោក Takahiro Mori នាយកតំណាង និងជាអនុប្រធាន ក្រុមហ៊ុន Nippon Steel បានឲ្យដឹងនៅក្នុងសេចក្តី ថ្លែងការណ៍មួយថា “យើងសង្ឃឹមថាប្រាក់រង្វាន់នេះបង្ហាញពីការប្តេជ្ញាចិត្តរយៈពេលវែងរបស់ក្រុមហ៊ុន Nippon Steel ក្នុងការចែករំលែកភាពជោគជ័យរបស់ក្រុមហ៊ុន US Steel និងការផ្តល់នូវអនាគតដ៏មានសុវត្ថិភាព សម្រាប់បុគ្គលិក គ្រួសារ និងសហគមន៍របស់ពួកគេ”។
កិច្ចព្រមព្រៀង ដែលបានស្នើឡើង បច្ចុប្បន្នកំពុងស្ថិត ក្រោមការត្រួតពិនិត្យ ដោយគណៈកម្មាធិការ វិនិយោគបរទេស នៅសហរដ្ឋអាមេរិក ដែលពិនិត្យថាតើប្រតិបត្តិការអន្តរជាតិ ដែលពាក់ព័ន្ធនឹងក្រុមហ៊ុន ក្នុងស្រុកអាចជះឥទ្ធិពល អវិជ្ជមាន ដល់សន្តិសុខជាតិ របស់សហរដ្ឋអាមេរិកដែរឬទេ ហើយដំណើរការគ្រោង នឹងបញ្ចប់នៅចុងខែធ្នូ។
ប្រធានាធិបតីជាប់ឆ្នោត របស់សហរដ្ឋអាមេរិកលោក ដូណាល់ ត្រាំ ក៏បាននិយាយផងដែរថា លោកនឹងរារាំងកិច្ច ព្រមព្រៀង ស្របតាមវេទិកា “America First” របស់លោក៕
