បរទេស៖ យោងតាមការចេញផ្សាយរបស់ RT អនុរដ្ឋមន្ត្រីការបរទេសរុស្ស៊ី លោក Mikhail Bogdanov បានបង្ហាញឱ្យដឹងថា អ្នកការទូតរុស្ស៊ីនៅទីក្រុងដាម៉ាស បានជួបជាមួយតំណាងរបស់ក្រុម Hayat Tahrir al-Sham ដែលជាបណ្តាញនៃក្រុមជីហាដ ទើបដណ្តើមអំណាចនៅក្នុងប្រទេសស៊ីរី។
HTS ដែលពីមុនត្រូវបានគេស្គាល់ថាជារណសិរ្ស Al-Nusra បានបើកការវាយលុកដ៏គួរឱ្យ ភ្ញាក់ផ្អើលមួយចេញពីទីក្រុង Idlib នៅចុងខែវិច្ឆិកា ដោយដណ្តើមយកបានទីក្រុង ដាម៉ាស កាលពីសប្តាហ៍មុនបន្ទាប់ពី ការតស៊ូនិមិត្តសញ្ញាពីកងទ័ពស៊ីរីហើយ ចាប់តាំងពីពេលនោះមក ប្រធានាធិបតី Bashar Assad បានទទួលសិទ្ធិជ្រកកោន នៅទីក្រុងមូស្គូរួចទៅហើយ។
លោក Bogdanov បានប្រាប់អ្នកយកព័ត៌មាន នៅទីក្រុងមូស្គូកាលពីថ្ងៃព្រហស្បតិ៍ថា ទំនាក់ទំនងត្រូវបានបង្កើតឡើង ជាមួយគណៈកម្មាធិការនយោបាយ ហៅកាត់ថាHTSដែលបច្ចុប្បន្នកំពុងធ្វើការ នៅក្នុងសណ្ឋាគារមួយក្នុងទីក្រុងដាម៉ាស។
ប្រទេសរុស្ស៊ីបានបញ្ជូនកងកម្លាំងបេសកកម្មចូលទៅក្នុងប្រទេសស៊ីរីក្នុងឆ្នាំ២០១៥ដោយបានជួយលោក Assad ក្នុងការប្រយុទ្ធប្រឆាំងនឹងក្រុមរដ្ឋអ៊ីស្លាមIS ដែលត្រូវបានគេស្គាល់ថាជា ISISក៏ដូចជាក្រុម Al-Nusra និងក្រុមដទៃទៀតហើយ យោងតាមលោក Bogdanov បេសកកម្មប្រឆាំងភេរវកម្មរបស់ទីក្រុងមូស្គូមិនទាន់បញ្ចប់នៅឡើយទេ។
ទន្ទឹមនឹងនេះ សមត្ថភាពយោធាជាច្រើនរបស់ ប្រទេសស៊ីរីត្រូវបានបំផ្លាញ ក្នុងរយៈពេលប៉ុន្មានថ្ងៃថ្មីៗនេះ ដោយការវាយប្រហារតាមអាកាស ជាបន្តបន្ទាប់របស់អ៊ីស្រាអែល ខណៈដែលក្រុងយេរូសាឡឹមខាងលិច បានឆ្លៀតយកឱកាសដើម្បីបង្កការ ខូចខាតដល់អាកាសយានដ្ឋាន មូលដ្ឋានទ័ពជើងទឹក ទីតាំងការពារដែនអាកាស និងសួនឧស្សាហកម្ម៕
ប្រែសម្រួល៖ ស៊ុន លី
