អង់ការ៉ា៖ ការដួលរលំនៃរដ្ឋាភិបាល របស់អតីតប្រធានាធិបតីស៊ីរីលោក បាសា អាល់អាសាដ អាចមានឥទ្ធិពលយ៉ាងខ្លាំងទៅលើសេដ្ឋកិច្ចរបស់ប្រទេសតួកគី ដោយផ្តល់ទាំងឱកាស និងបញ្ហាប្រឈមសម្រាប់ប្រទេសនេះ ។
លោក Engin Guner អ្នកជំនាញផ្នែកឧស្សាហកម្មសំណង់ មកពីទីក្រុងអង់ការ៉ា បានឲ្យដឹងថា ក្រុមហ៊ុនតួកគីត្រូវបានគេរំពឹងថា នឹងប្រកួតប្រជែង សម្រាប់កិច្ចសន្យាក្នុងការ កសាងឡើងវិញ នូវលំនៅដ្ឋាន និងហេដ្ឋារចនាសម្ព័ន្ធរបស់ប្រទេសស៊ីរី ។
សម្ព័ន្ធភាពសកម្មប្រយុទ្ធដែលដឹកនាំដោយក្រុម Hayat Tahrir al-Sham បានធ្វើការវាយលុកដ៏ធំ មួយពីភាគខាងជើងប្រទេសស៊ីរី កាលពីថ្ងៃទី២៧ ខែវិច្ឆិកា ហើយចាប់តាំងពីពេលនោះ មកបានវាយលុកទៅភាគខាងត្បូង តាមតំបន់ ដែលកាន់កាប់ដោយរដ្ឋាភិបាល របស់លោក អាសាដ ។ បន្ទាប់ពីការទទួលបានទឹកដី រួមទាំងការដណ្តើមយករដ្ឋធានីដាម៉ាស់ សម្ព័ន្ធមិត្តបានប្រកាសបញ្ចប់ការគ្រប់គ្រងរបស់លោក អាសាដ កាលពីថ្ងៃអាទិត្យកន្លងទៅនេះ។
បន្ទាប់ពីការដួលរលំយ៉ាងឆាប់រហ័ស នៃរដ្ឋាភិបាលរបស់លោក អាសាដ ភាគហ៊ុននៃក្រុមហ៊ុនសាងសង់ និងសំណង់បានកើនឡើង នៅផ្សារហ៊ុនទីក្រុងអ៊ីស្ដង់ប៊ុល នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
កួរបញ្ជាក់ថា មុនពេលមានជម្លោះ ស៊ីរី ជាដៃគូពាណិជ្ជកម្មដ៏សំខាន់សម្រាប់តួកគី។ ក្នុងនោះលោក Ali Oguz Dirioz សាស្ត្រាចារ្យរងផ្នែកទំនាក់ទំនងអន្តរជាតិនៅសាកលវិទ្យាល័យ TOBB នៃសេដ្ឋកិច្ច និងបច្ចេកវិទ្យានៃទីក្រុងអង់ការ៉ា លើកឡើងពីអត្ថប្រយោជន៍សេដ្ឋកិច្ចដ៏មានសក្តានុពល នៃការបើកផ្លូវពាណិជ្ជកម្មឡើងវិញ៕
