សេអ៊ូល៖ ទីភ្នាក់ងារព័ត៌មាន Yonhap បានរាយការណ៍ឲ្យដឹងថា កាលពីថ្ងៃអង្គារ អង្គភាពស៊ើបអង្កេតរួម របស់ប្រទេសកូរ៉េខាងត្បូង បានបញ្ជាក់ថា ប្រសិនបើប្រធានាធិបតី ដែលត្រូវបានចោទប្រកាន់ គឺលោក Yoon Suk-yeol បដិសេធមិនបង្ហាញខ្លួន សម្រាប់ការសាកសួរបន្ទាប់ពី ពេលវេលាពិតប្រាកដដែលបានកំណត់សម្រាប់ថ្ងៃពុធនេះទេ ការសម្រេចចិត្ត នឹងត្រូវបានធ្វើឡើង ក្រោយពីនោះ ថាតើ ត្រូវចេញដីកាកោះហៅមួយទៀត ដើម្បីហៅគាត់ចូលខ្លួន មកសវនាការ ។
សេចក្តីបង្គាប់កោះហៅ ដែលស្នើឱ្យ លោកប្រធានាធិបតី Yoon ចូលខ្លួនដើម្បីសាកសួរជុំវិញ ការចោទប្រកាន់ពីការបះបោរ របស់លោកនៅវេលាម៉ោង១០ព្រឹកម៉ោងក្នុងតំបន់នៅថ្ងៃពុធនេះ ត្រូវបានបញ្ជូនទៅឱ្យភាគីលោក Yoon កាលពីថ្ងៃអង្គារ ប៉ុន្តែត្រូវបានបញ្ជូនមកវិញដោយលើកឡើង ពីអង្គភាពស៊ើបអង្កេតចម្រុះ ។
អង្គភាពស៊ើបអង្កេតដែលបង្កើតឡើង ដោយប៉ូលិស របស់ប្រទេសនេះ ក្រសួងការពារជាតិ និងការិយាល័យស៊ើបអង្កេត អំពើពុករលួយសម្រាប់មន្ត្រីជាន់ខ្ពស់បានលើកឡើងថា ដីកាកោះនោះត្រូវបាន ប្រគល់មកវិញភ្លាមៗបន្ទាប់ពីការ បញ្ជូនរបស់ខ្លួន តាមសេវាប្រៃសណីយ៍ ។
ដោយឡែក រដ្ឋអាជ្ញាកូរ៉េខាងត្បូង បានស្នើឱ្យលោក Yoon បង្ហាញខ្លួន សម្រាប់ការ សាកសួរជុំវិញ ការដាក់ច្បាប់ អាជ្ញាសឹក របស់គាត់នៅថ្ងៃទី២១ ខែធ្នូ ។ ទីភ្នាក់ងារ Yonhap បានឲ្យដឹងនៅក្នុង សេចក្តីរាយការណ៍ លើកមុនកាលពីថ្ងៃអង្គារថា គឺជាសំណើ លើកទី២ដោយរដ្ឋអាជ្ញា របស់ប្រទេសនេះក្នុង រយៈពេលមិន ដល់មួយសប្តាហ៍នោះទេ ។
ក្រុមស៊ើបអង្កេតពិសេសរបស់អយ្យការបានបញ្ជូនដីកាកោះទៅឲ្យភាគីរបស់លោក Yoon កាលពីថ្ងៃចន្ទ ដោយស្នើឱ្យលោក Yoon ចូលខ្លួនដើម្បីសាកសួរជុំវិញ ការចោទប្រកាន់ពីបទបះបោរ និងការរំលោភបំពានអំណាច នៅត្រឹមថ្ងៃសៅរ៍ ៕
ប្រែសម្រួលដោយ៖ ម៉ៅ បុប្ផាមករា
