តូក្យូ៖ ប្រភពដែលដឹងអំពីបញ្ហានេះបានឲ្យដឹងថា ក្រុមហ៊ុនផលិតរថយន្តធំៗរបស់ជប៉ុន Honda Motor Co. និង Nissan Motor Co. កំពុងរៀបចំកិច្ចពិភាក្សាលើការរួមបញ្ចូលគ្នា ដែលនឹងបង្កើតក្រុមផលិតរថយន្តធំជាងគេទីបី របស់ពិភពលោក ទៅតាមបរិមាណ ចំពេលការប្រកួតប្រជែងជាសាកល ដ៏ខ្លាំងក្លានៅក្នុងរថយន្តអគ្គិសនី ដែលគ្រប់គ្រងដោយគូប្រជែងក្រៅប្រទេស។
ប្រភពបានឲ្យដឹងថា ក្រុមហ៊ុនផលិតរថយន្តធំទីពីរ និងទីបីរបស់ប្រទេសជប៉ុនកំពុងពិចារណា ពីលទ្ធភាពនៃការបង្កើតក្រុមហ៊ុនកាន់កាប់មួយ នៅក្នុងការដេញថ្លៃជាក់ស្តែងមួយ ដើម្បីបង្កើតសម្ព័ន្ធភាពរថយន្ត ដើម្បីប្រកួតប្រជែងជាមួយក្រុមហ៊ុន US Tesla Inc. និងក្រុមហ៊ុនផលិតរថយន្ត EV របស់ចិនដូចជា BYD Co.។
ក្រុមហ៊ុន Honda និង Nissan បានឲ្យដឹងនៅក្នុងសេចក្តីថ្លែងការណ៍មួយថា ពួកគេកំពុងពិចារណាលើលទ្ធភាពផ្សេងៗ សម្រាប់ការសហការនាពេលអនាគត ប៉ុន្តែមិនមានការសម្រេចចិត្តណាមួយ ត្រូវបានធ្វើឡើងនោះទេ នេះបើយោងតាមការចុះផ្សាយ របស់ទីភ្នាក់ងារសារព័ត៌មានក្យូដូជប៉ុន។
ការជួញដូរភាគហ៊ុនរបស់ក្រុមហ៊ុន Nissan ត្រូវបានផ្អាកមួយរយៈពេលខ្លីដោយផ្សារហ៊ុនតូក្យូ ដែលបានឲ្យដឹងថា ខ្លួនត្រូវការដើម្បីផ្ទៀងផ្ទាត់របាយការណ៍ប្រព័ន្ធផ្សព្វផ្សាយទាក់ទងនឹងកិច្ចពិភាក្សាបញ្ចូលគ្នា ប៉ុន្តែបានបន្តបន្ទាប់ពីសេចក្តីថ្លែងការណ៍ត្រូវបានចេញ។ ការរួមបញ្ចូលគ្នានេះនឹងបង្កើតសម្ព័ន្ធភាពគូប្រជែងក្នុងវិស័យឧស្សាហកម្មយក្ស Toyota Motor Corp. និង Volkswagen AG ជាមួយនឹងទំហំនៃការលក់រួមគ្នាឈានដល់ប្រហែល ៨ លានគ្រឿង ប្រសិនបើរថយន្តរបស់ដៃគូ Nissan Mitsubishi Motors Corp. ត្រូវបានរួមបញ្ចូល។
ក្រុមហ៊ុន Honda និង Nissan បានព្រមព្រៀងគ្នាក្នុងខែមីនា ដើម្បីចាប់ផ្តើមការសិក្សាលទ្ធភាព លើភាពជាដៃគូយុទ្ធសាស្ត្រក្នុងការផលិត EV និងបច្ចេកវិទ្យាសូហ្វវែរ ដើម្បីកាត់បន្ថយថ្លៃដើម និងបង្កើនភាពប្រកួតប្រជែង ដោយក្រុមហ៊ុន Mitsubishi Motors ចូលរួមកិច្ចពិភាក្សាក្នុងខែសីហា ៕
ប្រែសម្រួល ឈូក បូរ៉ា
