ព្រុចសែល ៖ អធិការបតីអាល្លឺម៉ង់លោក Olaf Scholz បានជំរុញឱ្យសហភាពអឺរ៉ុប ឈានដល់កិច្ចព្រមព្រៀងយ៉ាងឆាប់រហ័សជាមួយប្រទេសចិន លើជម្លោះពន្ធលើរថយន្តអគ្គិសនី (EVs) នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ ។
អធិការបតីអាល្លឺម៉ង់បានលើកឡើងនៅពេលមកដល់កិច្ចប្រជុំកំពូលរបស់ក្រុមប្រឹក្សាអឺរ៉ុបថា “វាមិនសមហេតុផលទេក្នុងការមានជម្លោះអំពីរឿងនេះ ដូច្នេះហើយ ខ្ញុំសូមអំពាវនាវដល់អ្នកគ្រប់គ្នាឱ្យនាំយកការចរចាទាំងនេះឱ្យមានលទ្ធផលល្អឥឡូវនេះ” ។ ក្រសួងពាណិជ្ជកម្មបានឲ្យដឹងថា ប្រទេសចិនសង្ឃឹមថា អឺរ៉ុប នឹងចាត់វិធានការជាក់ស្តែងឱ្យបានឆាប់តាមដែលអាចធ្វើទៅបាន ដើម្បីរួមគ្នាជំរុញការពិគ្រោះយោបល់លើផែនការការប្តេជ្ញាចិត្តតម្លៃសម្រាប់រថយន្ត EV របស់ចិន។
អ្នកនាំពាក្យរបស់ក្រសួងលោក He Yongqian បានឲ្យដឹងថា ប្រទេសចិនតែងតែឈរលើការដោះស្រាយជម្លោះពាណិជ្ជកម្មតាមរយៈការសន្ទនា និងការពិគ្រោះយោបល់ ហើយបាននិងកំពុងខិតខំប្រឹងប្រែងអស់ពីសមត្ថភាពក្នុងការចរចាលើការប្តេជ្ញាចិត្តតម្លៃ។ លោក Scholz ក៏បានអំពាវនាវដល់គណៈកម្មការអឺរ៉ុប ឱ្យបន្ធូរបន្ថយការអនុវត្តការពិន័យផ្នែកហិរញ្ញវត្ថុសម្រាប់ក្រុមហ៊ុនផលិតរថយន្តរបស់សហភាពអឺរ៉ុបដែលមិនបំពេញតាមគោលដៅនៃការបំភាយកាបូនឌីអុកស៊ីត (CO2) ក្នុងតំបន់ដែលបានកំណត់សម្រាប់ឆ្នាំក្រោយ។
លោក Scholz បានលើកឡើងថា “នៅក្នុងសម្ពាធពិភពលោកបច្ចុប្បន្ន ដែលកំពុងប្រឈមមុខនឹងឧស្សាហកម្មរថយន្ត ជាពិសេសនៅអឺរ៉ុប វាគ្មានន័យទេ ចំពោះក្រុមហ៊ុនដាក់បន្ទុកបន្ថែមទៀត ជាមួយនឹងការពិន័យ សម្រាប់គោលដៅដែលមិនបានសម្រេចក្នុងឆ្នាំ២០២៥” ។ លោកបានបន្ថែមថា “គណៈកម្មការគួរតែរកវិធីមួយ ដើម្បីប្រសិនបើការពិន័យក្លាយជាចាំបាច់ វាមិនប៉ះពាល់ដល់សន្ទនីយភាពហិរញ្ញវត្ថុ របស់ក្រុមហ៊ុនដែលឥឡូវនេះត្រូវការវិនិយោគលើការចល័តអេឡិចត្រូនិច ផលិតផលទំនើប និងយានយន្ត”។
កិច្ចព្រមព្រៀងបៃតងអឺរ៉ុប មានគោលបំណងសម្រាប់អព្យាក្រឹតអាកាសធាតុ នៅឆ្នាំ២០៥០ រួមទាំងការកាត់បន្ថយ ៩០ ភាគរយនៃការបំភាយឧស្ម័នផ្ទះកញ្ចក់ពីការដឹកជញ្ជូន។ ដើម្បីគាំទ្រដល់គោលដៅនេះ ច្បាប់នៃការបំភាយឧស្ម័ន របស់សហភាពអឺរ៉ុបដ៏តឹងរ៉ឹង សម្រាប់ក្រុមហ៊ុនផលិតរថយន្តនឹងចូលជាធរមានចាប់ពីឆ្នាំ២០២៥ ដែលទាមទារការបញ្ចេញឧស្ម័ន កាបូនិកជាមធ្យម ៩៣,៦ ក្រាមក្នុងមួយគីឡូម៉ែត្រ ឬតិចជាងនេះ។ ក្រុមហ៊ុនផលិតរថយន្តលើសពីដែនកំណត់នេះប្រឈមនឹងការផាកពិន័យចំនួន ៩៥អឺរ៉ូ (ប្រហែល ៩៨,៥៥ ដុល្លារអាមេរិក) ក្នុងមួយក្រាមក្នុងមួយឡាន ៕
ប្រែសម្រួល ឈូក បូរ៉ា
