សេអ៊ូល៖ រដ្ឋាភិបាលកូរ៉េខាងត្បូងបានឲ្យដឹងថា ខ្លួនគ្រោងនឹងធ្វើការត្រួតពិនិត្យសុវត្ថិភាពយ៉ាងម៉ត់ចត់នៃក្រុមហ៊ុនអាកាសចរណ៍តម្លៃទាប Jeju Air Co. បន្ទាប់ពីមានបញ្ហាឧបករណ៍ចុះចតម្តងហើយម្តងទៀត ដែលគេជឿថាបានបណ្តាលឱ្យធ្លាក់យន្តហោះរបស់ក្រុមហ៊ុន ដែលបានឆក់យកជីវិតមនុស្ស ១៧៩ នាក់កាលពីពេលថ្មីៗនេះ។
ក្រុមហ៊ុនអាកាសចរណ៍នេះស្ថិតក្រោមការស៊ើបអង្កេតជុំវិញការធ្លាក់ជើងហោះហើរលេខ 7C2216 ដែលបានធ្លាក់ចេញពីផ្លូវរត់ ខណៈកំពុងចុះចត និងបុកនឹងរបងអាកាសយានដ្ឋានអន្តរជាតិ Muan ក្នុងតំបន់ Muan County ចម្ងាយប្រហែល ២៩០ គីឡូម៉ែត្រភាគនិរតីនៃទីក្រុងសេអ៊ូល។
នៅព្រឹកថ្ងៃដដែល ជើងហោះហើរ Jeju Air ដាច់ដោយឡែកមួយដែលបានហោះចេញពីអាកាសយានដ្ឋានអន្តរជាតិ Gimpo បានត្រលប់មកវិញក្នុងអំឡុងពេលពាក់កណ្តាលជើងហោះហើរ ដោយសារបញ្ហាឧបករណ៍ចុះចតដែលត្រូវបានរកឃើញស្រដៀងគ្នានៅក្នុងការធ្លាក់កាលពីថ្ងៃអាទិត្យ។ វាជាយន្តហោះប្រភេទ Boeing B737-800 ដូចគ្នា ដែលជាប់ពាក់ព័ន្ធនឹងគ្រោះថ្នាក់នេះ។
លោក Joo Jong-wan ប្រធានគោលនយោបាយអាកាសចរណ៍នៅក្រសួងដឹកជញ្ជូនបានឲ្យដឹងក្នុងអំឡុងសន្និសីទខ្លីមួយនៅឯអគាររដ្ឋាភិបាល Sejong ថា “យើងមានគម្រោងអនុវត្តការត្រួតពិនិត្យសុវត្ថិភាពអាកាសចរណ៍យ៉ាងម៉ត់ចត់ ដើម្បីឆ្លើយតបទៅនឹងឧប្បត្តិហេតុ ដែលបង្កឡើងដោយឧបករណ៍ចុះចត” ។
លោកបានកត់សម្គាល់ថា Jeju Air ត្រូវបានគេស្គាល់ថា សម្រាប់អត្រាប្រើប្រាស់យន្តហោះខ្ពស់របស់ខ្លួន ដែលអ្នកសង្កេតការណ៍មួយចំនួនបានចង្អុលបង្ហាញថា ជាកត្តាដែលអាចកើតមាននៅក្នុងការធ្លាក់កាលពីថ្ងៃអាទិត្យ។ បន្ទាប់ពីបញ្ហាឧបករណ៍ចុះចត ដែលបានរាយការណ៍នៅថ្ងៃចន្ទនេះ ក្រសួងបានបញ្ជូនអ្នកត្រួតពិនិត្យសុវត្ថិភាពទៅកាន់ក្រុមហ៊ុន ដើម្បីស៊ើបអង្កេតករណីចុងក្រោយនេះ។
ទន្ទឹមនឹងនេះដែរ ឧបករណ៍ថតសំឡេងមួយក្នុងចំនោមឧបករណ៍កត់ត្រាការហោះហើរទាំងពីរ ដែលបានរកឃើញពីកន្លែងធ្លាក់ត្រូវបានរកឃើញជាមួយនឹងការខូចខាតផ្នែកខាងក្រៅ ហើយវាត្រូវបានដឹកជញ្ជូនទៅកាន់អាកាសយានដ្ឋានអន្តរជាតិ Gimpo សម្រាប់ការវិភាគបន្ថែម៕
ប្រែសម្រួល ឈូក បូរ៉ា
