បរទេស៖ យោងតាមលិខិត ដែលក្រសួងហិរញ្ញវត្ថុ ផ្ញើជូនសមាជិកសភាកាលពីថ្ងៃច័ន្ទ បានឱ្យដឹងថា ក្រុម Hacker ចិន ដែលឧបត្ថម្ភដោយរដ្ឋដែលត្រូវ បានចោទប្រកាន់ថា បានជ្រៀតចូលក្រសួងហិរញ្ញវត្ថុ សហរដ្ឋអាមេរិក ដោយចូលប្រើប្រាស់ឯកសារ ដែលមិនបានចាត់ថ្នាក់ និងកន្លែងធ្វើការមួយចំនួនដែលប្រើប្រាស់ដោយបុគ្គលិករដ្ឋាភិបាល។
យោងតាមសារព័ត៌មាន RT ចេញផ្សាយ នៅថ្ងៃទី៣១ ខែធ្នូ ឆ្នាំ២០២៤ បានឱ្យដឹងថា ក្រសួងហិរញ្ញវត្ថុ ត្រូវបានជូនដំណឹង អំពីការរំលោភ បំពាននេះ កាលពីថ្ងៃទី៨ ខែធ្នូដោយ BeyondTrust ដែលជាក្រុមហ៊ុនផ្តល់សេវា ផ្នែកទន់ភាគីទីបី។ ពួក Hacker ទទួលបានសោសុវត្ថិភាពដែលប្រើដោយអ្នកលក់ ដើម្បីទទួលបានសេវាកម្មដែលប្រើដោយភាគីទី៣ ដែលផ្តល់ការគាំទ្រផ្នែកបច្ចេកទេសពីចម្ងាយសម្រាប់អ្នកប្រើប្រាស់ចុងក្រោយរបស់ Treasury Departmental Office (DO)។ ជាមួយនឹងសោនេះ ជនល្មើសអាចទម្លុះផ្នែកសុវត្ថិភាព របស់សេវាកម្ម ចូលទៅកាន់ស្ថានីយការងារ ជាក់លាក់ពីចម្ងាយ និងទទួលបានសិទ្ធិ ចូលប្រើឯកសារ ដែលមិនបានចាត់ថ្នាក់ ដែលរក្សាទុកនៅលើប្រព័ន្ធទាំងនោះ។
ក្រសួងហិរញ្ញវត្ថុអាមេរិក បាននិយាយនៅក្នុងលិខិតផ្លូវការមួយចុះថ្ងៃទី៣០ ខែធ្នូថា “ផ្អែកលើសូចនាករដែលមាន ឧបទ្ទវហេតុនេះត្រូវបានគេសន្មតថា អ្នកហេកដែលត្រូវ បានឧបត្ថម្ភដោយរដ្ឋ ។
ក្រសួងបានចាត់ថ្នាក់ការបំពាននេះថា ជាឧប្បត្តិហេតុសន្តិសុខ តាមអ៊ីនធឺណិតដ៏សំខាន់ ហើយបានសហការជាមួយ FBI សហគមន៍ស៊ើបការណ៍សម្ងាត់ និងអ្នកស៊ើបអង្កេតផ្សេងទៀត ដើម្បីវាយតម្លៃផលប៉ះពាល់នៃការលួចចូល។ សេវាកម្មសម្របសម្រួល បានដាច់ ហើយមិនមានភស្តុតាង ណាមួយដែលបង្ហាញថា ជនល្មើសនៅតែមានសិទ្ធិ ចូលប្រើព័ត៌មាន របស់ក្រសួងនោះទេ៕
ប្រែសម្រួលៈ ណៃ តុលា
