ថៃ៖ ឆេះសណ្ឋាគារក្នុងក្រុងបាងកក ស្លាប់ជនបរទេស ៣នាក់ និងរបួសមនុស្ស៧នាក់

បរទេស៖ ជនរងគ្រោះបីនាក់ក្នុងភ្លើងឆេះស្លាប់ នៅក្នុងសណ្ឋាគារនៅជិតផ្លូវ Khao San ក្នុងទីក្រុងបាងកក ត្រូវបានគេកំណត់អត្តសញ្ញាណ រួមទាំងស្ត្រីជនជាតិប្រេស៊ីលដែលមិត្តប្រុស បានស្នើរសុំនាងកាលពីសប្តាហ៍មុនផងដែរ ខណៈដែលអាជ្ញាធរទេសចរណ៍ កំពុងរៀបចំសំណង។

យោងតាមសារព័ត៌មាន បាងកក ប៉ុស្តិ៍ ចេញផ្សាយកាលពីថ្ងៃទី៣០ ខែធ្នូ ឆ្នាំ២០២៤ បានឱ្យដឹងថា ជនរងគ្រោះទាំង​បី​ដែល​បាន​ស្លាប់​ក្នុង​គ្រោះ​អគ្គិភ័យ​នៅ​សណ្ឋាគារ The Ember នៅ​ផ្លូវ Tanee ក្បែរ​ផ្លូវ Khao San កាល​ពី​យប់​ថ្ងៃ​អាទិត្យ ត្រូវ​បាន​គេ​កំណត់​អត្តសញ្ញាណ​ថា​ ជា​ស្ត្រី​ប្រេស៊ីល​អាយុ ២៤ ឆ្នាំ Pimentel Canales Albuquerque , បុរស​អ៊ុយក្រែន​អាយុ ២៧ ឆ្នាំ ឈ្មោះ Tuzov Victor និង បុរសជនជាតិអាមេរិកអាយុ ៣៥ឆ្នាំ ឈ្មោះ Freeman Timothy Jr.។

ស្ត្រី​រូប​នេះ​បាន​ស្លាប់​ក្នុង​បន្ទប់​ ដែល​ភ្លើង​ត្រូវ​បាន​គេ​ជឿ​ថា​បាន​កើត​ឡើង​ដំបូង។ បុរស​ពីរ​នាក់​ទៀតត្រូវ​បាន​គេ​ប្រកាស​ថា​ ស្លាប់​នៅ​មន្ទីរពេទ្យ Vajira និង​មន្ទីរពេទ្យ Samitivej Chinatown ។

បន្ថែមលើសពីនេះ មនុស្សប្រាំពីរនាក់បានរងរបួស រួមទាំងអ្នកបច្ចេកទេសអគ្គីសនីនៅសណ្ឋាគារ Sorawut Liewhamai និងជនជាតិហូឡង់ពីរនាក់ Marvin Holtkamp និង Nadine Hueftlein។

អភិបាលក្រុងបាងកក លោក Chadchart Sittipunt បាននិយាយថា ក្រុមមន្ត្រីបានសន្មត់ថា អគ្គីភ័យបានចាប់ផ្តើមនៅក្នុងបន្ទប់លេខ ៥១១ ដោយសារតែវាបានបំផ្លាញតែបន្ទប់នោះ៕

ប្រែសម្រួលៈ ណៃ តុលា