បរទេស ៖ ទីភ្នាក់ងារចិនស៊ិនហួ ចេញផ្សាយនៅថ្ងៃនេះបានឲ្យដឹងថា ហេតុការណ៍គញ រោះរញ្ជួយដីដ៏ខ្លាំង មួយបានអង្រួន តំបន់ស្វយ័ត ទីបេរបស់ប្រទេសចិន នៅជិតភ្នំ Everest ដែលជាភ្នំខ្ពស់បំផុត របស់ពិភពលោក កាលពីព្រឹកថ្ងៃអង្គារ ដោយបានសម្លាប់មនុស្ស យ៉ាងហោចណាស់ ១២៦ នាក់ និងរបួស ១៨៨ នាក់។
ទីតាំងចំណុចកណ្តាលនៃការរញ្ជួយដីនេះមានទីតាំងនៅដាច់ស្រយាល Dingri County ចម្ងាយប្រហែល៥០ម៉ាយល៍ (៨០គីឡូម៉ែត្រ) ភាគខាងជើង នៃភ្នំEverest និងនៅជម្រៅរាក់បំផុតប្រមាណជា៦ ម៉ាយ នេះបើយោងតាមមជ្ឈមណ្ឌល បណ្តាញរញ្ជួយដីរបស់ប្រទេសចិន។
ទីភ្នាក់ងារស្ទាបស្ទង់ ភូមិសាស្ត្រអាមេរិក បានរាយការណ៍ថា គ្រោះរញ្ជួយដីដែលបានកើតឡើង ក្រោយម៉ោង៩ព្រឹកម៉ោង ក្នុងស្រុក មានកម្រិត៧.១រ៉ិចទ័រ ខណៈអាជ្ញាធរចិនវាស់បាន៦.៨រ៉ិចទ័រប៉ុណ្ណោះ។
នៅក្នុងទីក្រុង Shigatse ដែលជាមជ្ឈមណ្ឌលដ៏សំខាន់សម្រាប់ព្រះពុទ្ធសាសនាទីបេ និងកន្លែងប្រពៃណីរបស់ Panchen Lama អគារជាច្រើនត្រូវបានបំផ្លាញទៅជាកម្ទេចថ្ម ខណៈដែលប្រព័ន្ធ ផ្សព្វផ្សាយបានបង្ហាញ ពីវីដេអូនៃក្រុមអ្នក ពន្លត់អគ្គីភ័យ បានទាញអ្នក របួសចេញពីផ្ទះដែលដួលរលំ ហើយទាហានកំពុងរៀបចំ ជម្រកសង្គ្រោះបន្ទាន់ផងដែរ។
សីតុណ្ហភាពនៅក្នុងតំបន់នេះ បានធ្លាក់ចុះដល់ដក៦អង្សាសេ កាលពីយប់ថ្ងៃអង្គារ ហើយត្រូវបានគេព្យាករណ៍ថា នឹងធ្លាក់ចុះបន្ថែមទៀត ដែលធ្វើអោយមានភាពស្មុគស្មាញ ដល់ប្រតិបត្តិការជួយសង្គ្រោះ និងសង្គ្រោះ៕
ប្រែសម្រួល៖ស៊ុនលី
