លិចទូកទេសចរណ៍ ក្តោង២នៅកោះភូកេត ប្រទេសថៃ អ្នកទេសចរចិន ៣៣នាក់ ត្រូវបានជួយសង្គ្រោះ

បរទេស ៖ អ្នកទេសចរចិនចំនួន ៣៣ នាក់ត្រូវបានជួយសង្គ្រោះដោយសុវត្ថិភាព ពីការលិចទូក កាតាម៉ារ៉ាន (ទូកមានក្តោង២) ដែលធ្វើដំណើរ ចេញពីខេត្តទេសចរណ៍ ភាគខាងត្បូងនេះកាលពីរសៀលថ្ងៃច័ន្ទ ។

យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី១៣ ខែមករា ឆ្នាំ២០២៥ បានឱ្យដឹងថា ការិយាល័យនាយកដ្ឋាន សមុទ្រភូកេត បានទទួលដំណឹងថា ទូកកាតាម៉ារ៉ានឈ្មោះ Ameray 888 បានលិចចម្ងាយប្រហែល ១,៦ ម៉ាយពីខាងជើងកោះ Racha Yai នៅម៉ោង ១២៖៣០នាទីរសៀល។ កោះ Racha Yai ស្ថិតនៅភាគខាងត្បូងនៃភូកេត ។

យោងតាមអ្នកគ្រប់គ្រងទូក ដែលគេស្គាល់ថាជា Ef គឺទូកបានចាកចេញពីកោះ Racha Yai ទៅកាន់កោះ Hey ជាមួយនឹងភ្ញៀវទេសចរចិនចំនួន ៣៣នាក់នៅលើនោះ នៅពេលដែលបង្អួចកញ្ចក់នៅខាងស្តាំ របស់ទូកបានបែក ហើយបណ្តាលឱ្យរលកបានហូរចូលទៅក្នុងទូកនោះ។

ទូកកាតាម៉ារ៉ានបានលិច ក្នុងរយៈពេលប្រហែល ២០ នាទី។ អ្នកទេសចរចិន មគ្គុទ្ទេសក៍ទេសចរណ៍ និងកូនជាងដែលពាក់អាវពោង ត្រូវបានជួយសង្គ្រោះដោយសុវត្ថិភាព ដោយទូកនៅក្បែរនោះ រួមទាំងទូកទេសចរណ៍ Rhapsody និងទូកនេសាទ Maliwan ផងដែរ៕
ប្រែសម្រួលៈ ណៃ តុលា