បរទេស ៖ យោងតាមការចេញផ្សាយ របស់ RT អង្គការ NATO បានប្រកាសកាលពីថ្ងៃអង្គារថា ខ្លួននឹងបង្កើនវត្តមាន នៅសមុទ្រ បាល់ទិករបស់ខ្លួន ដោយចាប់ផ្តើម បេសកកម្មថ្មីមួយ ក្រោមមូលហេតុជាការការពារ ហេដ្ឋារចនាសម្ព័ន្ធ ក្រោមបាតសមុទ្រ បន្ទាប់ពីមានការរំខានជាច្រើន និងការខូចខាតដល់ខ្សែ ដែលដំណើរការរវាងប្រទេសជាសមាជិកប្លុក។
កន្លងមកប្រទេសរុស្ស៊ី តែងតែចាត់ទុកនិងយល់ឃើញថា សមុទ្របាល់ទិកជាតំបន់យុទ្ធសាស្ត្រ សម្រាប់ប្រតិបត្តិការទ័ពជើងទឹក និងការនាំចេញ ថាមពលដ៏សំខាន់បំផុត។
ប្រតិបត្តិការ ដែលត្រូវបានហៅឈ្មោះថាBaltic Sentry ពីសំណាក់អគ្គលេខាធិការ នៃប្លុកយោធាដឹកនាំ ដោយសហរដ្ឋអាមេរិក លោក Mark Rutte បានបង្ហាញថា វត្តមាននឹងមានការចូលរួមពីនាវាចម្បាំង យន្តហោះល្បាតដែនសមុទ្រ និង កងនាវាតូចមួយ នៃយន្តហោះគ្មានមនុស្សបើក ដែលត្រូវបានគេរំពឹងថា នឹងផ្តល់ការបង្កើនការឃ្លាំមើល និងការទប់ស្កាត់ការបង្កហេតុនានា។
គួរឲ្យដឹងដែរថាឧប្បត្តិហេតុ មួយចំនួនត្រូវបានគេជឿជាក់ថា មានការពាក់ព័ន្ធនឹងកប៉ាល់ចិនឈ្មោះ Yi Peng 3 ដែលរងការចោទប្រកាន់ថាបានអូសយុថ្កានិងកាត់ខ្សែនៅបាតសមុទ្រ ។
ក្រុមអ្នកស៊ើបអង្កេត របស់សហភាពអឺរ៉ុប ត្រូវបានអនុញ្ញាត ឱ្យឡើងលើនាវានេះ ហើយប្រទេសចិនបាននិយាយថា ខ្លួននឹងសហការជាមួយ នឹងការស៊ើបអង្កេត ដែលកំពុងបន្តនេះ៕
ប្រែសម្រួល៖ស៊ុនលី
