បរទេស ៖ ប្រធានាធិបតីអាមេរិក លោក Donald Trump បាននិយាយកាលពីថ្ងៃអាទិត្យថា ប្រជាជនអាមេរិក អាចមានអារម្មណ៍ “ឈឺចាប់ខ្លះ” ពីសង្គ្រាមពាណិជ្ជកម្ម ដែលកំពុងកើតឡើង ដែលបង្កឡើងដោយពន្ធគយ របស់លោកប្រឆាំងនឹងកាណាដា ម៉ិកស៊ិក និងប្រទេសចិន ហើយបានអះអាងថា កាណាដានឹង “ឈប់មាន” ដោយគ្មានអតិរេកពាណិជ្ជកម្ម ជាមួយសហរដ្ឋអាមេរិក ។
យោងតាមសារព័ត៌មាន AP ចេញផ្សាយនៅថ្ងៃទី៣ ខែកុម្ភៈ ឆ្នាំ២០២៥ បានឱ្យដឹងថា ការពិន័យផ្នែកពាណិជ្ជកម្ម ដែលលោក Trump បានចុះហត្ថលេខា កាលពីថ្ងៃសៅរ៍នៅឯរមណីយដ្ឋាន Florida គឺបានបង្ក ឱ្យមានភាពស្លន់ស្លោ កំហឹង និងភាពមិនប្រាកដប្រជា ហើយបានគំរាមកំហែង ធ្វើឱ្យខូចភាពជាដៃគូ ដែលមានអាយុកាលរាប់ទសវត្សរ៍លើពាណិជ្ជកម្ម នៅអាមេរិកខាងជើង ខណៈដែលទំនាក់ទំនងកាន់តែតានតឹងជាមួយប្រទេសចិន។
លោក Trump កាលពីយប់ថ្ងៃអាទិត្យបានត្រឡប់មកពីរដ្ឋផ្លរីដា ហើយបានគំរាមយកពន្ធដ៏តឹងរ៉ឹងនៅកន្លែងផ្សេងទៀត ដោយប្រាប់អ្នកសារព័ត៌មានថា ពន្ធនាំចូលនឹង “ប្រាកដណាស់នឹងកើតឡើង” ជាមួយសហភាពអឺរ៉ុប និងអាចជាមួយចក្រភពអង់គ្លេសផងដែរ។
លោកក៏បានច្រានចោលវិធានការ សងសឹកពីប្រទេសកាណាដា ដោយនិយាយថា “ប្រសិនបើពួកគេចង់លេងហ្គេម ខ្ញុំមិនប្រកាន់ទេ។ យើងអាចលេងហ្គេម ដែលពួកគេចង់បាន»។ លោក Trump បាននិយាយថា លោកគ្រោងនឹងនិយាយជាមួយសមភាគីកាណាដា និងម៉ិកស៊ិកនៅថ្ងៃច័ន្ទ៕
ប្រែសម្រួលៈ ណៃ តុលា
