កសិដ្ឋានចិញ្ចឹមឆ្កែចំនួន ៤០ភាគរយ នៅប្រទេសកូរ៉េខាងត្បូងបានបិទ បន្ទាប់ពីការហាមឃាត់ការបរិភោគ

កូរ៉េខាងត្បូង៖ ក្រសួងកសិកម្ម ស្បៀងអាហារ និងកិច្ចការជនបទបាននិយាយកាលពីថ្ងៃចន្ទថា កសិដ្ឋានចិញ្ចឹមសត្វឆ្កែ ចំនួន ៤០ភាគរយក្នុងប្រទេសកូរ៉េខាងត្បូង បានបិទចាប់តាំងពីច្បាប់ហាមឃាត់ ការទទួលទានសត្វឆ្កែបានចូលជាធរមានកាលពីឆ្នាំមុន។

ទិន្នន័យរបស់ក្រសួងបង្ហាញថា កសិដ្ឋានសត្វឆ្កែចំនួន ៦២៣ ក្នុងចំណោម ១,៥៣៧ បានបិទចាប់តាំងពីខែសីហា ឆ្នាំ២០២៤ មក។ ក្រុមមន្ត្រីបានព្យាករណ៍ថា ប្រហែល ៦០ភាគរយនៃកសិដ្ឋានសត្វឆ្កែទាំងអស់ ក្នុងប្រទេសនឹងឈប់ដំណើរការនៅចុងឆ្នាំនេះ។

សារព័ត៌មាន Korea Herald បានរាយការណ៍ថា ការហាមប្រាមបានចូលជាធរមានកាលខែសីហា ឆ្នាំ ២០២៤ ហាមប្រាមការបង្កាត់ពូជ ការកាប់សម្លាប់ ការចែកចាយ និងការលក់សត្វឆ្កែសម្រាប់សាច់។ នៅក្រោមបទប្បញ្ញត្តិថ្មី អ្នកបំពានអាចប្រឈមមុខនឹង ការជាប់ពន្ធនាគាររហូតដល់ ២ ឆ្នាំ និងពិន័យជាប្រាក់រហូតដល់៣០លានវ៉ុន (២០,៦៣៧ ដុល្លារអាមេរិកចាប់ពីឆ្នាំ ២០២៧។

មន្ត្រីក្រសួងកសិកម្មបាននិយាយថា រដ្ឋាភិបាលមានគម្រោងគាំទ្រកសិដ្ឋានចិញ្ចឹមសុនខ ដែលរងផលប៉ះពាល់ក្នុងការផ្លាស់ប្តូរ ទៅអាជីវកម្មផ្សេងទៀត ឬបិទទ្វារនៅឆ្នាំ ២០២៧៕