បរទេស ៖ យោងតាមការចេញផ្សាយរបស់ RT អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ប្រធានាធិបតីរុស្ស៊ី លោក Vladimir Putin និងសមភាគីអាមេរិក លោក Donald Trump អាចនឹងធ្វើការជួបជុំគ្នានៅចុងខែកុម្ភៈនេះ។
ថ្លែងទៅកាន់អ្នកសារព័ត៌មានកាលពីថ្ងៃពុធ លោក Peskov បាននិយាយថា កិច្ចពិភាក្សារុស្ស៊ី-អាមេរិកបានធ្វើឡើងកាលពីថ្ងៃមុននៅទីក្រុងរីយ៉ាដ ប្រទេសអារ៉ាប៊ីសាអូឌីត បានផ្តោតលើផែនទីបង្ហាញផ្លូវមួយក្នុងគោលបំណង បង្កើតទំនាក់ទំនងទ្វេភាគីឡើងវិញ ដោយសង្កត់ធ្ងន់ដំបូងលើ ការស្តារឡើងវិញ អមដោយ ការស្តារឡើងវិញ នៃទំនាក់ទំនងរវាងទីក្រុងមូស្គូ និងវ៉ាស៊ីនតោន ។
កិច្ចពិភាក្សាដែលដឹកនាំដោយរដ្ឋមន្ត្រីការបរទេសរុស្ស៊ី លោក Sergey Lavrov និងរដ្ឋមន្ត្រីការបរទេសអាមេរិក Marco Rubio គឺជាការប៉ុនប៉ង ដោយផ្ទាល់លើកដំបូង ដោយសហរដ្ឋអាមេរិក និង រុស្ស៊ី ដើម្បីធ្វើឱ្យទំនាក់ទំនងមានលក្ខណៈធម្មតាឡើងវិញ បន្ទាប់ពីមានជម្លោះជិតបីឆ្នាំ ក្រោមការគ្រប់គ្រង របស់អតីតប្រធានាធិបតីអាមេរិក Joe Biden ។
គួរឲ្យដឹងដែរថាគណៈប្រតិភូមកពី ទីក្រុងមូស្គូ និងវ៉ាស៊ីនតោនបានពិភាក្សាអំពីកិច្ចចរចាសន្តិភាពអ៊ុយក្រែននាពេលអនាគត និងជំនួបកំពូលដ៏មានសក្តានុពល រវាងលោក Putin និងលោក Trump ផងដែរ។
លោក Peskov បាននិយាយថា មេដឹកនាំទាំងពីរអាចជួបគ្នាក្នុងខែនេះ ប៉ុន្តែទោះបីជាយ៉ាងណាក៏ដោយ លោកបានបន្ថែមថា វាអាចត្រូវការពេល វេលាបន្ថែមទៀត ដើម្បីរៀបចំនូវអ្វីដែលនឹងក្លាយជាជំនួបទល់មុខគ្នាជាលើកដំបូង រវាងប្រធានាធិបតីរុស្ស៊ី និងសហរដ្ឋអាមេរិក ចាប់តាំងពីឆ្នាំ២០២១នៅពេលដែលលោក Putin និងលោក Biden បានជួបគ្នានៅក្នុងកិច្ចប្រជុំកំពូល នៅទីក្រុងហ្សឺណែវ៕
ប្រែសម្រួល៖ស៊ុនលី
