បរទេស៖ នាយកប្រតិបត្តិក្រុមហ៊ុន Tesla លោក Elon Musk បានចោទ ActBlue ដែលជាវេទិការៃអង្គាសថវិការបស់ គណបក្សប្រជាធិបតេយ្យដ៏ធំមួយ ដែលត្រូវបានគាំទ្រផ្នែកថវិកាដោយឥស្សរជន ដ៏មានអំណាចជាច្រើន រួមទាំងមហាសេដ្ឋី George Soros ពីការសម្របសម្រួលលើការវាយប្រហារ មកលើក្រុមហ៊ុនរបស់លោក។
យោងតាមសារព័ត៌មាន RT ចេញផ្សាយនៅថ្ងៃទី១០ ខែមីនា ឆ្នាំ២០២៥ បានឱ្យដឹងថា មហាសេដ្ឋី Elon Musk បានចោទប្រឆាំងនឹងវេទិកា ActBlue និងអ្នកគាំទ្ររបស់វេទិកានេះ នៅក្នុងការបង្ហោះនៅលើ X ដោយជំរុញឱ្យអ្នកប្រើប្រាស់ដែលមានចំណេះដឹង លើសកម្មភាពបែបនេះដើម្បីចែករំលែក ភស្តុតាងបន្ថែមទៀតលើអ៊ីនធឺណិត។
លោក Musk បានសរសេរថា “ការស៊ើបអង្កេតបានរកឃើញ ក្រុមដែលផ្តល់មូលនិធិដោយ ActBlue ចំនួន ៥ ដែលទទួលខុសត្រូវចំពោះ ‘ការតវ៉ា’ របស់ Tesla: អ្នកបង្កើតបញ្ហា គម្រោងរំខាន ការកើនឡើង & តស៊ូ គម្រោងមិនអាចបំបែកបាន និងសង្គមនិយមប្រជាធិបតេយ្យរបស់អាមេរិក។
លោកបានបន្ថែមថា “អ្នកផ្តល់មូលនិធិដល់ ActBlue រួមមាន មហាសេដ្ឋី George Soros, Reid Hoffman, Herbert Sandler, Patricia Bauman និង Leah Hunt-Hendrix” ។
លោក Musk បាននិយាយទៀតថា វេទិការៃអង្គាសថវិការបស់អ្នកប្រជាធិបតេយ្យ បច្ចុប្បន្នកំពុងស្ថិតក្រោមការស៊ើបអង្កេតសម្រាប់ ការអនុញ្ញាតឱ្យមានការបរិច្ចាគពីបរទេស និងខុសច្បាប់ក្នុងការរំលោភបំពាន បទប្បញ្ញត្តិហិរញ្ញវត្ថុនៃយុទ្ធនាការ។ លោកបានបន្ថែមថា ក្នុងរយៈពេលមួយសប្តាហ៍កន្លងមកនេះ មន្ត្រីជាន់ខ្ពស់ចំនួនប្រាំពីររូប រួមទាំងទីប្រឹក្សាទូទៅរបស់ខ្លួនផងដែរ បានលាលែងពីមុខតំណែង។
Tesla ត្រូវបានគេកំណត់គោលដៅដោយការតវ៉ាកាន់តែខ្លាំង ក្នុងរយៈពេលប៉ុន្មានសប្តាហ៍កន្លងមកនេះ ដោយមានទីតាំងជាង ៥០ នៅទូទាំងសហរដ្ឋអាមេរិកដែល រងការវាយប្រហារដោយបាតុកម្ម។ ក្រុមអ្នកតវ៉ាបានជំរុញឱ្យលោក Musk “ចាកចេញ” ជាមួយនឹងការប្រមូលផ្តុំគ្នាដោយប្រើពាក្យស្លោកដូចជា “យើងត្រូវការខ្យល់អាកាសបរិសុទ្ធ មិនមែនមហាសេដ្ឋីផ្សេងទៀតទេ” ជាដើម។ ក្រៅពីនោះ ក្រុមហ៊ុនលក់ Tesla ជាច្រើនត្រូវបានកំណត់គោលដៅ ដោយការវាយប្រហារដោយការដុតបំផ្លាញ ៕
ប្រែសម្រួលៈ ណៃ តុលា
