បរទេស ៖ ទីភ្នាក់ងារចិនស៊ិនហួ ចេញផ្សាយនៅថ្ងៃនេះ បានឲ្យដឹងថា ប្រធានាធិបតីអាមេរិក លោក Donald Trump កាលពីថ្ងៃចន្ទ បានព្រមានថា អ៊ីរ៉ង់នឹង ទទួលរងនូវផលវិបាកធ្ងន់ធ្ងរ សម្រាប់ការវាយប្រហារ បន្ថែមទៀត ពីសំណាក់ក្រុមHouthi ដែលមានមូលដ្ឋាន នៅប្រទេសយេមែន។
លោក Trump បានសរសេរនៅលើបណ្តាញសង្គម Truth Social ថា៖រាល់ការបាញ់ប្រហារដោយក្រុម Houthis នឹងត្រូវបានមើលពីចំណុចនេះទៅខាងមុខ ដូចជាការបាញ់ចេញពីអាវុធ និងការដឹកនាំរបស់ប្រទេសអ៊ីរ៉ង់។ដូច្នេះអ៊ីរ៉ង់នឹងទទួលខុសត្រូវ ហើយទទួលរងផលវិបាក ហើយផលវិបាកទាំងនោះនឹងធ្ងន់ធ្ងរបំផុត ។
លោក Trump ក៏បានចោទប្រកាន់អ៊ីរ៉ង់ពីការផ្តល់អាវុធ លុយ និងការស៊ើបការណ៍សម្ងាត់ដល់ក្រុម Houthis។
គួរឲ្យដឹងដែរថា កាលពីព្រឹកថ្ងៃចន្ទ លោក Alexus Grynkewich ដែលជាប្រធានប្រតិបត្តិការរួម បាននិយាយនៅ ក្នុងសន្និសីទសារព័ត៌មាន មួយរបស់មន្ទីរបញ្ចកោណថា សហរដ្ឋអាមេរិកបានវាយប្រហារ ទៅលើគោលដៅរបស់ក្រុម Houthi ចំនួន៣០នៅទីតាំងកាលពីថ្ងៃសៅរ៍។
ក្នុងនោះផងដែរលោកបាននិយាយថា ការវយាប្រហារជាច្រើនទៀត នឹងត្រូវបានធ្វើឡើងនៅថ្ងៃអាទិត្យ និងថ្ងៃចន្ទ ហើយប្រតិបត្តិការនឹងបន្ត នៅក្នុងប៉ុន្មានថ្ងៃខាងមុខនេះ រហូតដល់យើងសម្រេច បាននូវគោលបំណងរបស់ប្រធានាធិបតី៕
ប្រែសម្រួល៖ស៊ុនលី
