បរទេស ៖ យោងតាមមន្ត្រីសេតវិមានបានឲ្យដឹងថា លោកប្រធានាធិបតី ដូណាល់ ត្រាំ គ្រោងនឹងចុះហត្ថលេខា លើក្រឹត្យប្រតិបត្តិមួយ នៅថ្ងៃព្រហស្បតិ៍ ដោយអំពាវនាវ ឱ្យបិទក្រសួងអប់រំសហរដ្ឋអាមេរិក ដោយជំរុញការសន្យាយុទ្ធនាការ ដើម្បីលុបបំបាត់ទីភ្នាក់ងារ ដែលជាគោលដៅយូរមកហើយ របស់អ្នកអភិរក្សនិយម។ មន្ត្រីរូបនេះបាននិយាយក្នុងលក្ខខណ្ឌ នៃការមិនបញ្ចេញឈ្មោះ មុនពេលមានការប្រកាសបិទ ។
យោងតាមសារព័ត៌មាន AP ចេញផ្សាយនៅថ្ងៃទី២០ ខែមីនា ឆ្នាំ២០២៥ បានឱ្យដឹងថា លោក ត្រាំ បាននិយាយចំអកក្រសួងអប់រំថា ខ្ជះខ្ជាយ និងបំពុលដោយមនោគមវិជ្ជាសេរី ។ ទោះជាយ៉ាងណាក៏ដោយ ការបញ្ចប់ការរុះរើរបស់ក្រសួងអប់រំ ទំនងជាមិនអាចទៅរួចទេ បើគ្មានវិធានការរបស់សភា ដែលបានបង្កើតនាយកដ្ឋាននៅឆ្នាំ ១៩៧៩។
ឯកសារ របស់សេតវិមាន បាននិយាយថា បទបញ្ជានេះនឹងដឹកនាំលេខាធិការ Linda McMahon “ឱ្យចាត់វិធានការចាំបាច់ទាំងអស់ ដើម្បីជួយសម្រួល ដល់ការ បិទក្រសួងអប់រំ និងប្រគល់សិទ្ធិអំណាចអប់រំទៅឱ្យរដ្ឋ ខណៈដែលបន្តធានានូវការផ្តល់សេវា កម្មវិធី និងអត្ថប្រយោជន៍ ដែលប្រជាជនអាមេរិកពឹងផ្អែក” ប្រកបដោយប្រសិទ្ធភាព និងគ្មានការរំខាន។
រដ្ឋបាល លោក ត្រាំ បាននិងកំពុងកាត់ទីភ្នាក់ងារនេះរួចហើយ ។ កម្លាំងការងាររបស់ក្រសួងអប់រំ កំពុងត្រូវបានកាត់បន្ថយពាក់កណ្តាល ហើយមានការកាត់យ៉ាងជ្រៅ ទៅកាន់ការិយាល័យសិទ្ធិស៊ីវិល និងវិទ្យាស្ថានវិទ្យាសាស្ត្រអប់រំ ដែលប្រមូលទិន្នន័យអំពីវឌ្ឍនភាពសិក្សារបស់ប្រទេស៕
ប្រែសម្រួលៈ ណៃ តុលា
