បរទេស៖ យោងតាមការចេញផ្សាយរបស់ RT ប្រទេសរុស្ស៊ី និងអ៊ុយក្រែនបានធ្វើការដោះដូរអ្នកទោសសង្គ្រាមសាជាថ្មីម្តងទៀតហើយបន្ទាប់ពីការចរចាបទឈប់បាញ់ថ្មីៗនេះរវាងប្រធានាធិបតី Vladimir Putin និងសមភាគីអាមេរិកលោក Donald Trump។
ប្រធានាធិបតី Putin ធ្លាប់បានយល់ព្រមផ្លាស់ប្តូរអ្នកទោសចំនួន ១៧៥នាក់ និងបញ្ជូនអ្នកប្រយុទ្ធអ៊ុយក្រែន ២២ នាក់ ដែលរងរបួសយ៉ាងធ្ងន់ធ្ងរមកវិញ ជាកាយវិការនៃសុច្ឆន្ទៈរួចមកហើយ។
ក្រសួងការពារជាតិរុស្សិបានបញ្ជាក់ថា ការផ្លាស់ប្តូរនេះត្រូវបានសម្របសម្រួលដោយប្រទេសអារ៉ាប់រួម ហើយទាហានរុស្ស៊ីដែលត្រូវបានដោះលែងបច្ចុប្បន្នកំពុងស្ថិតនៅក្នុងប្រទេសបេឡារូសដែលនៅជិតខាង។
សេចក្តីថ្លែងការណ៍ដដែលបានបន្ថែមថាពួកគេនឹងត្រូវផ្ទេរទៅស្រុកកំណើតរបស់ពួកគេក្នុងពេលឆាប់ៗនេះដើម្បីព្យាបាលនិងស្តារនីតិសម្បទាឡើងវិញទាំងអស់។
ការផ្លាស់ប្តូរអ្នកទោសត្រូវបានប្រកាសកាលពីថ្ងៃអង្គារបន្ទាប់ពីការហៅទូរស័ព្ទរវាង Trump និង Putinដែលមានរយៈពេលជិត២ម៉ោងកន្លះដោយក្នុងនោះ វិមានក្រឹមឡាំងបាននិយាយថា ប្រទេសរុស្ស៊ីនឹងផ្អាកការវាយប្រហារលើហេដ្ឋារចនាសម្ព័ន្ធថាមពលអ៊ុយក្រែនរយៈពេល៣០ថ្ងៃ ហើយបានប្រកាសថាទីក្រុងមូស្គូ និងទីក្រុងគៀវនឹងធ្វើការដោះដូរអ្នកទោសគ្នាផងដែរ៕
ប្រែសម្រួល៖ ស៊ុនលី
