យេរ៉ូសាឡឹម៖ កងកម្លាំងការពារអ៊ីស្រាអែល និងទីភ្នាក់ងារសន្តិសុខអ៊ីស្រាអែលបានឲ្យដឹងថា ការវាយប្រហារបានសម្លាប់លោក Osama Tabash ដែលជាប្រធានចារកម្មយោធារបស់ក្រុមហាម៉ាស់ នៅតំបន់ហ្គាហ្សាភាគខាងត្បូង។
សេចក្តីថ្លែងការណ៍រួមបានឲ្យដឹងថា លោក Tabash ក៏ទទួលបន្ទុកលើអង្គភាពឃ្លាំមើល និងកំណត់គោលដៅរបស់ក្រុមហាម៉ាសផងដែរ។ មិនមានការឆ្លើយតបភ្លាមៗពីក្រុមហាម៉ាស់ លើការអះអាងនេះទេ។
អ៊ីស្រាអែល បានបន្តការវាយប្រហារនៅតំបន់ហ្គាហ្សា កាលពីថ្ងៃអង្គារ បន្ទាប់ពីបទឈប់បាញ់ ជាមួយក្រុមហាម៉ាស់ ដែលបានចាប់ផ្តើមនៅថ្ងៃទី១៩ ខែមករា មិនបានសម្រេច។ ទាហានអ៊ីស្រាអែល បានបើកប្រតិបត្តិការជើងគោកជាបន្តបន្ទាប់នៅភាគខាងត្បូង ភាគខាងជើង និងកណ្តាលតំបន់ហ្គាហ្សា។
ចាប់តាំងពីការបន្តការ វាយប្រហារតាមអាកាសមក អ៊ីស្រាអែល បានសម្លាប់មន្ត្រីជាន់ខ្ពស់របស់ក្រុមហាម៉ាស់ ជាច្រើននាក់ រួមទាំងលោក Issam al-Daalis សមាជិកការិយាល័យនយោបាយរបស់ក្រុមហាម៉ាស់ និងជាប្រធានគណៈកម្មាធិការតាមដានរដ្ឋាភិបាលនៅតំបន់ហ្គាហ្សា។
ក្រសួងការពារជនស៊ីវិលនៅតំបន់ហ្គាហ្សា បានឲ្យដឹងថា យ៉ាងហោចណាស់មនុស្ស ១១នាក់ត្រូវបានសម្លាប់នៅក្នុងការវាយប្រហារតាមអាកាសកាលពីថ្ងៃសុក្រ ដោយចំនួនអ្នកស្លាប់សរុបពីការវាយប្រហារជាថ្មី របស់អ៊ីស្រាអែលនៅតំបន់ហ្គាហ្សាអាចមានលើសពី ៦០០នាក់ បន្ថែមពីលើអ្នករបួសជាង ១០០០នាក់៕
ប្រែសម្រួល ឈូក បូរ៉ា
