បរទេស៖ នាយកដ្ឋានប្រាក់ចំណូលរបស់ប្រទេសថៃ បានជំរុញឱ្យអ្នកមានឥទ្ធិពល លើប្រព័ន្ធផ្សព្វផ្សាយសង្គម (influencers) និងអ្នកលក់អនឡាញ ត្រូវដាក់ឯកសារបង្ហាញពីប្រាក់ចំណូលប្រចាំឆ្នាំ របស់ពួកគេនៅចុងខែមីនា ដើម្បីជៀសវាងការផាកពិន័យ ។
យោងតាមសារព័ត៌មាន VN Express ចេញផ្សាយនៅថ្ងៃទី២៤ ខែមីនា ឆ្នាំ២០២៥ បានឱ្យដឹងថា អគ្គនាយកនាយកដ្ឋានប្រាក់ចំណូល លោក Pinsai Suraswadi បានសម្តែងការព្រួយបារម្ភថា អ្នករកប្រាក់ចំនូលវ័យក្មេងជាច្រើន រួមទាំងអ្នកលក់ e-commerce, អ្នកមានឥទ្ធិពល និងអ្នកត្រួតពិនិត្យផលិតផល មិនដែលបង្ហាញប្រាក់ចំណូលទេ។
វេទិកាពាណិជ្ជកម្មអេឡិចត្រូនិក របស់ប្រទេសថៃដូចជា Shopee, Lazada និង TikTok មានអ្នកលក់អនឡាញប្រហែល ៣ លាននាក់ ខណៈដែលអ្នកមានឥទ្ធិពល និងអ្នកបង្កើតមាតិកាប៉ាន់ស្មាន ២ លាននាក់បង្កើតប្រាក់ចំណូលរាប់ពាន់លាន។ ការស្ទង់មតិថ្មីៗនេះបានរកឃើញថា មនុស្សជាច្រើននៅក្នុងក្រុមនេះ ជាពិសេសបុគ្គលវ័យក្មេង ខកខានមិនបានរាយការណ៍ ពីប្រាក់ចំណូលរបស់ពួកគេ ឬបង់ពន្ធ នោះទេ។
លោក Pinsai បានព្រមានថា នាយកដ្ឋានប្រាក់ចំណូល អាចធ្វើសវនកម្មលើកំណត់ត្រារហូតដល់ ៥ ឆ្នាំត្រឡប់មកវិញ ហើយការខកខានក្នុងការដាក់ ឯកសារពន្ធនឹងនាំឱ្យមានការពិន័យ។ ទោះយ៉ាងណាក៏ដោយ លោកបានធានាដល់អ្នករកប្រាក់ចំណូលឡើងវិញថា កំហុសនៃការដាក់ឯកសារអាចត្រូវបានកែតម្រូវ។
ការសិក្សាមួយដោយ Tellscore, FutureTales LAB និងវិទ្យាស្ថានថៃសម្រាប់និរន្តរភាពសុខភាពផ្លូវចិត្ត (Tims) បានប៉ាន់ប្រមាណថា ឧស្សាហកម្មបង្កើតមាតិការបស់ប្រទេសថៃ បានរួមចំណែកយ៉ាងតិច ៤៥ពាន់លានបាត (១,២៥ ពាន់លានដុល្លារ) ជារៀងរាល់ឆ្នាំដល់សេដ្ឋកិច្ច។
ប្រទេសនេះមានអ្នកបង្កើតមាតិកាពេញម៉ោងប្រហែល ២ លាននាក់ កើនឡើង ដល់ ៩ លាននាក់នៅពេលដែលអ្នកបង្កើតក្រៅម៉ោង និង “អ្នកបង្កើតឥទ្ធិពលមីក្រូ” ត្រូវបានរួមបញ្ចូល៕
ប្រែសម្រួលៈ ណៃ តុលា
